BRICS Summit neihnaah PM Modi leh Xi inbia

Prime minister Narendra Modi leh China President Xi Jinping chuan nimin, Nilaini khan BRICS summit hmanna Kazan, Russia-ah summit kar lakah inbiakna hun an hmang.

Ram pahnih hruaitute hi kum nga hnua mumal taka inbiakna an neih leh vawikhatna a ni. Meeting an neih hma hian ram pahnihte hian Ladakh khawchhak lam ramria buaina an neih te chinfelna turin inremna pawh an lo siam tawh a ni.

Inbiakna an neih tur chungchang hi Thawhlehni khan foreign secretary Vikram Misri chuan a tarlang a, kum 2020 a Galwan Valley-a ram pahnih sipaite inbeihna a thlen hnuah, Ladakh khawchhak lama Line of Actual Control(LAC) sipaite patrol dan tur chungchangah inremna siam a nih thu a sawi.

Kum 2020, June thlaa Galwan Valley-a ram pahnih sipaite inbeihna thleng avangin India leh China inkar boruak pawh hi a ṭha lo chho hle a ni. Ramri chungchangah inremna kawng zawngin inbiakna pawh neih fo a lo ni tawh bawk a, mahse inremna siam thei loin sipai chakna hmangin an innek zui reng a ni.

Kum 2020, November thla khan Indonesia-a G20 hruaitute intawhkhawmnaah Modi leh Xi hi an lo inhmu tawh a, kum 2023 August thla khan Johannesburg-a BRICS summit neih kar lakah rei vak lo an inkawm tawh bawk.