Mimal dan vangin naupang inneihtir khapna tih tawp theih a ni lo: SC

Supreme Court Bench, chief justice of India DY Chandrachud leh Justice JB Pardiwala leh Manoj Misra te awmna chuan ramchhungah naupang inneihtirna khapna dan, Prohibition of Child Marriage Act chu mimal leh hnam dan te vanga palzam theih a nih loh thu a sawi.

Bench chuan nimin Zirtawpni, October 18, 2024 khan naupang inneihtir hian kawppui tur thlang tura an zalenna bawhchhiat sakna a ni tih a tarlang nawn leha, "Heng inneihna te hian kumtling lo naupang ten an nundan an thlanna tura dikna chanvo an neih chu a kalh a ni" a ti.

Naupang kum tling lo inneih tirna khapna dan tarlangin, Prohibition of Child Marriage Act, of 2006 chu kum tling loa naupangte inneih tir ṭhin venna tura duan a ni a, he dan thar hian Child Marriage Restraint Act of 1929 chu a thlak tih an tarlang.

"Vantlang mila venhimna siam te, dan chu awmze nei zawka hman a nih theihna tura peng hrang hranga thawh hona ṭha siam leh, dan ṭha taka hman a nih theihna tura zirtirna leh thawh hona kaihruai tur officer an awm a ṭul bakah, khawtlang mamawhna a zira hmalakna neih chu a ṭul a ni," tiin bench hian a sawi bawk.