Supreme Court-in Lady of Justice lim thar pholang

Lady of Justice lim thar chu Supreme court-a judge te library ah pho lan niin a hmaa lim siam ang lo takin mit tuamna leh chem a ken ṭhin te chu tih bo a ni. Chem aiah hian Constitution of India chu a kut veilamah a keng a, bukna (patla) lem ken erawh a la keng tel thung.

Lim an dah hmasa zawk, mittuam leh chem keng hi British awpna hnuaia awm lai British ho hnutchhiah kha la niin, a mit tuam hi 'dan hmaah chuan tupawh ang khat vek kan ni' tih entirna a ni a, chem lem a ken hian 'thil dik lo te chu thuneitu leh thiltih theihna hmanga hrem theihna' entirna a ni a, bukna hi 'tehfung in ang tlang' entirna a ni ve bawk.

Chief Justice of India(CJI) DY Chandrachud chuan mi lim thar chungchang a sawinaah, India chu British sulhnu hnutchhiah te aṭanga hmasawn tur a ni tih leh dan chu a mit a del loa, mi zawng zawng ang khatin a en zawk thu a sawi. "Mi lim chuan chem ni loin Constitution chu a kut pakhatah a keng tur a ni, hei hian rampumah constitution milin dikna a tarlang ang" tiin "Court chuan constitutional law milin dikna a pe ṭhin, chem chuan tharum thawhna a en tir zawk"a ti.

CJI in amah thlak turin Justice Sanjiv Khanna rawt

CJI DY Chandrachud chuan sorkar hnenah amah thlak tur leh Chief Justice of India 51-na turin Justice Sanjiv Khanna a rawt. CJI nilai hi kumin November 10-ah a chawl tawh dawn a ni.

Supreme Court Judge leh Chief Justice of India te hna chelh dan tur Memorandum of Procedure for appointment duansa in a tarlan danin, CJI hna chelh lai chuan amah thlaktu tur chu Law Ministry hnenah ngaihtuah tura rawtna a thlen thei a ni. Sorkar laipuiin a rawtna hi a pawm a nih chuan, Justice Khanna hian Chandrachud thlakin, nakkum May 13 thleng CJI dinhmun hi a chelh thei ang.