Haryana CM thar atan Nayab Singh Saini lak luh a ni

BJP hruaitu, Nayab Singh Saini chu Ningani, October 17,2024 khan Haryana Chief Minister atan lak luh a ni a, CM hi term hnih a chelhna tur chiah a ni.

Haryana assembly inthlan neih zawh takah khan BJP hian seat 90 awmah seat 48 la in hnehna an chang a, a zawna term thum an chakna a ni. Independent MLA pathum chuan BJP sorkar thar hi thlawp an tum bawk.

Nimina CM thar lak luhna ah hian prime minister Narendra Modi, union home minister Amit Shah, defence minister Rajnath Singh bakah BJP CM dangten an telpui a ni.

Haryana governor Bandaru Dattatreya chuan CM thar hi Panchkula-ah rinawmna thu tiam tirin a la lut a, a cabinet minister tur mi 13 te a la lut nghal bawk. Cabinet minister atana lak luh zingah hian hmeichhe pahnih an tel.

Nayab Singh Saini hi Nilaini khan BJP legislature Party leader atan thlan a ni a, thlan zawha thu a sawiah "Haryana mipuite hian Prime Minister Modi- policy ah te beiseina an nghah ngam avangin vawi thumna atan BJP sorkar chu mipui ten an din leh a ni. Hei hi PM hmathlir, 2047- a ram intodelh nihna tihhlawhtlinna tur kawng pawimawh tak a ni," a ti. .

CM thar lak luhna hi Valmiki hnam te hun pawimawh Valmiki Jayanti, Pargat Diwas ni ah tak neih a ni a, hei hi BJP sorkarin Dalit hnam nena thawh hona tih ngheh leh tih tharna a tumna pakhat nia ngaih a ni bawk.