Bengal-a MGNREGA worker 4,700 in PM hnenah ngenna thlen

West Bengal-a Mahatma Gandhi National Rural Employment Guarantee Scheme (MNREGS) hnuaia hna thawktu mi 4,700-te chuan prime minister Narendra Modi hnenah West Bengal-ah scheme hi kalpui chhunzawm tura ngenna an thlen. West Bengal-ah December 2021 aṭang khan he scheme hi tihtawp a ni.

Thawktute hian NREGA Sangharsh Morcha kaihhruain postcard campaign an nei a, Prime Minister hnenah hian cheng khat ṭheuh thawnin sorkar laipuiin hma a lak loh chuan anmahniin scheme tihnunna turin fund an tuak mai a ngai dawn niin an sawi.

He scheme hi state-a Trinamool Congress (TMC) sorkar leh central-a BJP sokrar inkara inbeihna awm avangin tihtawp lailawk a ni. Sorkar laipui lam hian Bengal sorkarin scheme a kalpuinaah hian eirukna leh thil felhlel leh sum tihchingpente a awm niin a sawi a, mahse state sorkar chuan dik lo awmte tih dika hma a lakna report a thehlut a, heti chung hian scheme hi tihtawp a la ni ta reng a ni. Sorkar laipui chuan hemi chungchangah hian sawi a nei zui tawh rih lo thung.

Pashim Banga Khet Mazdoor Samity kaihhruainain Thawhlehni khan hnathawktu 100 chu Kolkata-a State BJP headquarters-ah 'Gherao' programme hmangin an pungkhawm a ni.