Ṭek laka inven nan Odisha-in Palm kung nuai 20 phun dawn

Odisha sorkar chuan ṭek laka invenna atan Palm kung nuai 20 a phun dawn a, thing ṭiak phun hna hi a kalpui ṭan tawh.

State chhungah ṭek den avanga thihna tawk leh hliam tuar an awm nasa thei hle a, kum 2015 khan state sorkar chuan ṭek tla avanga chhiatna thleng hi state-in chhiatna a tawh ṭhin lian zingah a lo telh tawh a ni.

Odisha Revenue and Disaster Management minister, Suresh Pujari chuan August 18, Pathianni khan Odisha chu ramchhung state zingah ṭek tlain harsatna a thlenna nasa ber a nih avangin palm kung phun hi invenna atan phun an tum tih a sawi. "State forest department hnuaiah palm kung nuai 20 phun hna hi state pum huapa kal pui mek niin, state pumpui tuam chhuak tura ruahman a ni. Venhim ngai zual sikulte chu thlurbing deuh bik niin, he beihpui thlakna hian ṭek leh a kaihhnawih vanga thihna thleng chu a tihhniam bakah a thlen loh phah hial pawh kan beisei," a ti. State sorkar chuan thla hmasa khan he rawtna hi a lo pawmpui tawh a ni.

Kum 11 liam ta chhung khan Odisha-ah hian mihring 3,790 laiin ṭek den vangin nunna an chan a, tun hnai kum thum chhungin mi 791 in ṭek tla avang hian nunna an chan tawh bawk. State sorkarin a chhinchhiah danin ṭek tlak nasat ber ṭum, September 2, 2023 khan darkar hnih chhungin ṭum 61,000 chuang ṭek tlain, mi 12 in nunna an chan phah a ni.

Special Relief Commissioner office-in a tarlan danin ṭek den vang hian 2021-2022 chhung khan mi 282 in nunna chanin, 2022-2023 ah 297 leh 2023-2024 chhungin 212 in nunna an chan. State sorkar hian kum 2015 aṭang khan ṭek den vanga nunna chan chhungte hnenah zangnadawmna Rs nuai 4 a pe ṭhin.