India bawlhlo 12% dawnin endikna paltlang lo

India rama siam bawlhlo (spice) sample endik zingah 12% dawn chuan a him dan tur chin leh ṭhat lam tehna standard siam an pha lo. Ram eng emaw zatin India rama brand lar pahnihte thil siam a thianghlim tawk lo tih an sawi hnuah thuneitute chuan spice endik hna an kalpui a ni.

Hong Kong-in MDH leh Everest brands-ten an bawlhlo siamna atana an pawlh ṭhin chu pesticide a tam avangin April thla khan hralh phalna a titawp a, hemi hnu hian Food Safety and Standards Authority of India chuan endikna hna chu heng bawlhlo siam chhuahah hian a nei a ni.

Britain ram pawhin India aṭanga bawlhlo chawk luh chu a khuahkhirh zui ve nghal - New Zealand, United States leh Australia pawhin heng brands te hi an zirchian ve tur thu an tarlang zui ve bawk.

MDH leh Everest chuan an bawlhlo te chu ei atana a thianghlim tawk thu an sawi thung a, an thil siamchhuahte chu India ram chhunga hralh tam ber a nih thu te, khawvel huap pawha thawn chhuah tam leh mipui lei nasat ber niin an inchhal. Heng an bawlhlo te hi Europe, Asia leh North America-ahte hralh nasat a nih thu an tarlang ve bawk a ni.

Right to Information Act kaltlanga Reuter-in an data lakkhawma a lan danin, May aṭanga July thla tira bawlhlo chi hrang 4,054 enchhinna neih zinga 474 lai chuan a him chin tur bituk lam chu an phak loh thu an tarlang. Safety agency chuan heng bawlhlo endikte hi brands angin an thliar hrang lo tih leh, tehnaa tling tawk lote chungah a ṭul anga hma an lak tur thu an sawi. Reuters chuan endikna paltlang zo lote report hi dil mah se agency chuan an hming hi a tarlang lo thung.

India rama spice market hlut zawng hi Zion Market Research-in a tarlan danin kum 2022 khan dollar vbc 10.44 a tling pha a, heng bawlhlo thawn chhuah hrang hrangte hlut zawng hi March thla, sorkar kum tawp thleng khan dollar vbc 4.46 a tling pha a ni.