Vanglaini - PM Modi hoin security review meeting nei

KHAWTHLIR

Hnam dang truck phalsak rih lo

Champhai Import-Export Transport Forum (CEITU), Mizoram Export-Import Union, Importer Exporter Syndicate, MTOA leh MTDA-te November 19, 2020-a ṭhukhawm chuan, Covid-19 hripui laka mipui an him zawk nan hnam dang truck-te'n kumin chhung chuan Champhai aṭangin bungrua phur chhuak ve tawh rih lo se, an ti.

Inhlawhna siamsak

Aizawl North-II MLA Dr Vanlalthlana chuan Covid-19 lockdown avanga a bial chhunga khawsak harsa zawkte tan inhlawhna a siamsak. Covid-19 léng vanga sorkarin inkhàrkhip a kalpui a ngai a, mi tam takin hna thawk thei loin harsatna an tawh avangin, MLA hian a biala chhungkaw 200 chuang tan inhlawhna a siamsak a; thlànmual leh veng chhung hmun ṭhenkhat tihfai a ni.

SRH-ah mi 45 awm

State Referral Hospital-ah nimin khan Covid-19 vei mi pakhat dah luh a ni a, ani nen mi 45 an awm mek a, an zingah kum 60 chung lam mi 16 an tel. SRH-ZMC Bulletin tarlan danin, mi 45 zinga pathum chu ICU-ah enkawl an ni a, mi dang zawng chu Isolation ward-ah an awm a ni.

Journalist thi rál

Chanchinbumi July 14, 2020-a thi Francis Paul (Gerrard-a Pa) chhungte hnenah Mizoram sorkarin a ràlna Rs. 1,00,000 chu nimin khan IPR director Lallianpuii'n Mizoram Journalist Welfare Society kaltlangin a hlàn. Ràlna inhlanna hi IPR Director pisaah neih a ni a, MJA hruaitute an tel. Francis Paul hi Doordarshan Kendra, Aizawla sports magazine buatsaihtu ṭhin a ni a, MJA member a ni.

Complaint tum

ZPM chuan, January 16, 2020-a Tripura leh Mizoram sorkarin Ministry of Home Affairs kaihhruainaa inremna an siam tawh hnu pawha Tripura-a khawsa zui ta Bru-te Mizoram Electoral Roll aṭanga tun thlenga paih an la nih loh avangin Election Commission of India-ah complaint thehluh an tum thu an tarlang. ZPM hian ECI-a zualkona hi Mizoram Chief Electoral Officer kaltlangin November 23, 2020-ah thehluh an tum a ni.

DAWNTISEI

PM Modi hoin security review meeting nei

Firfiakten 26/11-a Mumbai beih a nih champhaah India ramah pawikhawihna lian tham tak thlen leh a tum nia sawi a awm avangin, Prime minister Narendra Modi hoin nimin khan home mnister Amit Shah, national security advisor (NSA) Ajit Doval, foreign secretary Harsh Vardhan Shringla leh intelligence hotuten security review meeting an nei.

Jammu and Kashmir-a Nagrota-a sipai leh firfiakte inbeihna a thlen hnuah, firfiakte 26/11-a Mumbai beih a nih champhaah pawikhawihna lian tak thlen leh an tum nia sawi a ni. Hei vang hian PM hoin security review meeting hi neih zui nghal a ni.

Ningania Nagrota-a firfiak leh sipaite inbeihna thlengah hian firfiak pali pali kahhlum an ni. An pali hian UN-in firfiak pawla a lo puan tawh, Jaish-e-Mohammed(JeM) mi leh sa nia hria tan ni.

Share this Post

Login to comment

No Comments