Zu vanga damdawi-in lut an tam: Duhoma

ZNP president Lalduhoma chuan, Mizo-ramah zu vanga damlo, damdawi-in lut an tam hle nia sawiin, "Zu vanga thihna a thlen mek lai hian sorkar hian a khát tâwkin endik reng turin kan phut a ni,” a ti.

Nimina ZNP pisaa inkhawmah thu sawiin Lalduhoma chuan, MNF sorkar chu zu zuar hmasa ber anga a sawi, MNF
ṭhalaite'n an sawifiah chu a chhang a; Mizoram state a nih hma a sawi lo a, state nih hnua party zinga zu zuar hmasa ber an nih thu a sawi niin a sawi.

Mizoram sorkar chu leimin pakhat pawh paih fai thei loah puhin, Duh-oma chuan, "Kan
ṭawngkam hmanah pawh ‘Sorkar chak tak’ ti loin, ‘Sorkar chak lo tak’ tih hman zawk tur a ni,” a ti.

Lalduhoma chuan, "Sorkar hian chhiatna a thlenin insawifiah nan khuarel chhiatna an ti a. Ruahsur vanga lo hâl huna hâl thei lo chu FIR thehluh khumin, misual angin an hrem a; khuarel chhiatna ve tho si hi kan party chuan kan hrethiam thei lo," a ti a; ruahsur vanga a huna lo hâl thei lote sorkarin hrem a tum chu an dem thu a sawi.

ZNP President chuan, Luang-muala Carbon Products chungchang sawiin, Central YMA-in complaint an thehluh chu Chief Minister leh Industries Minister-te'n chhanna an pe lo niin a sawi a, "Eirukna lian tak nia a lan avangin, a rang thei ang bera sawifiah turin sorkar kan phût," a ti a; sorkarin CYMA thu thlen a ngawihbopui avangin corruption lian tak a awma ngaih theih a nih thu a sawi.

Dan loa khaw dinah dan loa din a ni tih hre reng chungin sorkarin tui, êng leh zirna sikulte a pe a, chumi dodaltu zirlaite chu sorkarin a do ta zawk niin a sawi bawk.