Rangkachak suam thubuai HM-in CBI hnena hlan tum chhan a sawifiah

Home minister R Lalzirliana chuan nimin khan Aizawl Press Club-ah thuthar thehdarhtute kâwmin, rangkachak tawlhrûk suam thubuai chungchang chhui tura Mizoram sorkarin CBI hnena hlan a tum chhan a sawifiah.

R Lalzirliana chuan, thubuai chu ziah luh a nih aṭangin Mizoram police-te'n thâ thlah loin an chhui char char tih sawiin, "Special Investigation Team (SIT)-te'n ngawrh takin chhui mah se, insuamna hmun aṭanga an rûkbo rangkachakte tun thlengin hmuh chhuah a la ni lo. Insuamna hi December 14, 2015 zana thleng tawh a nih avangin misualte hian duh thálin an thil rûkbote chhehrelhna hun an nei a ni," a ti.

Home Minister sawi danin, rangkachak chu state páwn thlengin zawn a ngai dawn a, chuvang chuan, rangkachak chu a rang thei ang bera hmuh chhuah a nih theih nan leh chak zawka thubuai chhui a nih theih nan CBI hnena hlan mai sorkarin ṭha zawkin a hria a ni.

R Lalzirliana chuan, thubuaia a bul tumtu ber nia hriat, 39 Assam Rifles commandant hlui Col. Jasjit Singh leh a hnuaia thawk Assam Rifles sipaite chu Armed Force Act hnuaia awm an nih avangin thu zawhfiah kawngah harsatna a awm palh thei tih a sawi a, "Assam Rifles sipaite hi hnam dang an ni tlangpui a, Hindi lo ṭawng dang thiam lote an ni. Hei vang hian thubuai chhuina duh angin a kal chak thei loa hriat a ni," a ti.

Home Minister chuan, rangka-chak suam thubuai lian tak leh ram pum ngaihven chhuinaah hmanraw changkang leh ṭha, hnu chhuina
ṭanpui thei tur khawl hman a ṭul ṭhin tih sawiin, "Tun dinhmunah chuan kan khawl neihte'n duhthu a sâm tawk hrih lo," a ti a; CBI chuan hmanrua, sum leh mi an neih danah harsatna an neih ve loh avangin chak zawka an chhui theih an beisei thu a sawi.