KHAWTHLIR

Journalist workshop

Ministry of Women & Child Development chuan vawiin hian New Delhi-ah All India Women Journalists’ Workshop an buatsaih dawn a, Mizoram aṭangin Nancy Lalramthangi (Romei) leh C Lalthansangi (AIR)-te an kal. Khawmpui hi Women and Child Development minister Maneka Sanjay Gandhi-in a hmanpui ang.

Ran vulh zirtir

Agriculture Technology Mangement Agency (ATMA), Saiha district chuan nimin khan MADC Forest hall-ah 'Farmers Scientists Interaction on Common Livestock Diseases' an buatsaih a, MAC CEM RT Zachono-a'n a hmanpui. Zachono chuan, ran vulhtute chu ṭhahnemngai tak leh hlawhtlin tum ngei tura theihtawp chhuah turin a fuih.

Remna Ni

Nimin khan Mamit additional DC H Lianzela hoin Mamit district-a Remna Ni hman dan tur ngaihtuah a ni. Mamit khawpui chhunga kohhran hrang hrangte chu June 26 (Pathianni) zanah Remna Ni puala
ṭawngṭai tur leh Remna Ni zingah dár vawi 30 vaw tura ngen ni se, an ti.

Tuiin naupang la

June 4, 2016 chawhnu lama ruahsûr vanga Saiha SCM Veng leh Council Veng inkara luikawr tui lian thutin kawnga kal lai naupang, AZ Beireingia (7) s/o AZ Beiro, Saiha ECM Veng a la a, AZ Beireingia hi kawng thlangah tlain, ká chhawn lohin a thi. Thu dawn danin, tuiin AZ Beireingia a lak hnuah a ṭhiante'n puitling an pun a, a chetsualna aṭanga metre 100 vela hláah thiin an hmu a ni.

Pâ ei vangin thi

C Biakhmingmawia (12) s/o C Lalrodinga, Vang-chhia, Champhai district chu pâ (mushroom) ei vangin June 5 zing dar 2 vel khan a thi. Thu dawn danin, C Lalro-dinga te chhungkua hian June 3, 2016 zan khan Pasawntlung leh Pase-êk siam pawlh an ei a, an ei zan aṭangin khawṭhalo leh luakin a tibuai a, C Biakhmingmawia chu Pathianni zing khan a thi a ni.