Jammu and Kashmir-a political party lian parukte chuan Ningani khan J&K tana special status pekna, Article 370 chu an neih leh theihna tur leh, mipuite dikna chanvo humhalh tura hmalatu tur, "Peoples' Alliance for Gupkar Declaration" an din. 

Ningani khan J&K-a regional political party-te chuan meeting neiin, he hunah hian National Conference (NC), Peoples Democratic Party (PDP) , Peoples Conference (PC), Communist Party of India Marxist (CPI-M), Peoples Movement (PM) leh Awami National Conference (ANC) hruai­tute an tel. Srinagar-a chief minister hlui Farooq Abdullah chenna inah inhmukhawmin, darkar hnih chhung an sawiho hnuah ṭangrual pawl, "Peoples' Alliance for Gupkar Declaration" an din thu hi an puang a ni. 

Abdullah chuan he ṭangrual pawl din thar hian nikum August 5-a central-a BJP kaihhruai NDA sorkarin Jammu and Kashmir special status pekna, Article 370 a ṭhiah tak chu an neih let theihna atan  theihtawp a chhuah dawn tih a sawi. "Jammu and Kashmir leh Ladakh aṭanga min chhuhsak chu nei let leh turin kan bei dawn a ni. India sorkar chu August 5, 2019-a state mipuite dikna chanvo neih a laksak chu pe kir turin kan duh a ni," a ti. 

National Conference (NC) president Farooq Abdullah chuan Kashmir chungchangah resolution siam a hun tih sawiin, "State political issue hi a rang thei anga bera chinfel a hun tawh a ni. 

J&K buainain a kaih­hnawih stakeholder hrang hrangte nen inbiakna nei a, boruak muanawm tak hnuaia chinfel thuai kan duh," tiin a sawi. 

Ningania meeting neih hi nikum August 5-a Article 370 tihtawp a nih leh, J&K state ṭhiat a, union territory pahnih - Jammu and Kashmir leh Ladakh-a ṭhen a nih hnua political party liante inhmuhkhawmna hmasa ber a ni. 

Hetih lai hian Jammu-a BJP chuan regional party-te pawl din thar, "Peoples' Alliance for Gupkar Declaration" hi sawiselin, he pawl hi mipuite tana inzawmkhawm ni loin, politician lal duh vanga pawl inzawmkhawm zawk an ni, a ti. 

Share this Post