ZMC tihhmasawn dan tur rêl

Nimin khan chief minister Lalduhoma hoin CMO Conference Hall-ah Zoram Medical College tihhmasawn zel dan tur ngaihtuah a ni a, Health minister Lalrinpuii leh department official-te an tel.

Ṭhutkhawmah hian ZMC-in National Medical Council endikna a hmachhawn mek dan te, online inspection leh CCTV inspection a kal mek thute tarlan a ni a; ZMC behchhanin helipad leh fire station siam thuai a ṭul thu pawh sawi a ni.

ZMC-a thawktu ZMC Society hnuaia lakte leh Mizoram sorkar hnuaia lakte felfai zawka enkawl dan tur sawiho a ni a; kum 2019-a zirchiangtu committee-in report an siam tawh dan sawi a ni. ZMC-a thawkte chu Mizoram sorkar hnuaia lak luh vek ṭha an ti a; Council of Minister thuneihna a nih avangin Council of Minister a ngaihtuah tura thlen an rêl.

CM Lalduhoma chuan, tun hnaia ruahsur nasa leh leimin vanga ZMC-in harsatna a tâwk chu pawi a tih thu sawiin, tluang taka thil a kal leh thuai theih nan theihtawp a chhuahpui thu leh tun thlenga a ngaihven zui reng thu a sawi.

Ṭhutkhawmah hian Health & Family Welfare leh ZMC hotute bakah, Finance, DPAR leh Law & Judicial department hotute an tel a ni.