ZPM-in AMC candidate an puang

ZPM party president Lalliansawta chuan June 25, 2024-a AMC Ward-XIX by-election neih tura an candidate tur nimin khan a puang a, an candidate tur chu Dr C Malsawmtluangi (45), Hlimen a ni.

Nimin khan ZPM pisaah candidate tur puanna hun hman a ni a, Lalliansawta chuan, candidate thlanah an fimkhur a, an uluk thu sawiin, "Candidate ṭha tak mai kan nei hi kan lawm em em a, kan hotute thawhrimnaah kan lawm hle," a ti a; Mizoram sorkar hnuaiah corporator ṭha tak thlan chhuah a nih theih nan thawhpuiah Ward XIX mipui a sáwm.

Dr C Malsawmtluangi chuan, ram leh hnam tana ke pên ve thei tura hun remchang a nei chu a lawm thu a sawi a, "He dinhmun ropui tak hi ka luah theih nan bial chhung mipuite thawh­puiah ka sáwm a, kan ram siam ṭha tur hian mimal mai chuan tih theih ka nei lo, kan zavaia kan ṭan rual a ngai a ni," a ti.

Dr C Malsawmtluangi d/o C Lalhmingliana, Hlimen hi May 8, 1979-ah Aizawlah a piang a, kum 2006-ah Lalmuanawma nen inneiin, fa pathum an nei a, Hlimen Veng­thlangah an khawsa mek. Kum 2011 khan NEHU Department of Zoology aṭangin Ph.D a zo a; kum 2014-2016 chhung sorkar laipuia Department of Science and Technology-ah women scientist hna a thawk a, kum 2018-2021 chhung National Mission on Himalayan Studies GBPNIHESD under Himalayan Fellowship-ah research associate hna a thawk bawk.

AMC term kal mekah Ward-XIX hi hmeichhe bial a ni a, 2021 inthlanpuia thlan tlin Baryl Vanneihsangi chuan MLA a nih tawh avangin AMC a chhuahsan a, by-election neih a ngai a ni. Ward XIX-ah hian Kulikawn, Tlangnuam, Tlangnuam Vengthar, Saikhamakawn, Melthum leh Hlimente a awm.