Vanglaini - International Solar Alliance president India

KHAWTHLIR

ATC BD result

Senate of Serampore College hnuaia Bachelor of Divinity (BD) final year result nimin khan a chhuak a; hriat theih chinah Aizawl Theological College (ATC) aṭanga zirlai 25 exam zingah mi pali chu first class (A-)-ah an pass a, second class (B+)-ah mi 17 leh B-ah mi pathum an pass bawk. Back paper neih vanga la pass lo pakhat a awm a ni.

ZPM ṭhalai hruaitu

Zoram Peoples' Movement (ZPM) office bearers-te nimina an president Lalliansawta hoa ṭhukhawm chuan ZPM Ṭhalai president atan Malsawmzuala, Mission Veng an ruat nawn. Vice president atan Lalṭanpuia Zote, Bethlehem Vengthlang leh treasurer atan H Vanlalhuma, Mission Veng-te ruat an ni bawk.

Ambulance pe

Lawngtlai West bialtu MLA C Ngunlianchunga chuan a MLA fund hmanga a lei ambulance thar chu nimin khan Mizoram State Cancer Institute, Zemabawk hnenah a hlân. C Ngunlianchunga chuan, damdawi-ina ambulance a pek chu politics-a thangṭhat lak tum vang a nih loh thu leh, cancer natna tuarte harsatna sutkian a duh vang a nih thu a sawi.

Mask puan sem

Aizawl North-II bialtu MLA Dr Vanlalthlana chuan Covid-19 vanga harsatna tâwkte ṭanpui nan nimin khan a biala self help group (SHG)-te hnenah hmai tuamna (mask) siamna puan (non-woven material) leh elastic band a sem a, SHG-te'n mask an ṭhui tawh ṭhahnem tak chu mipuia sem leh turin a leisak nghal.

ICU-ah 4 enkawl

State Referral Hospital-ah Covid-19 vei vangin mi 36 enkawl mek an ni a, an zinga panga chu nimina dah luh an ni. SRH-ZMC Bulletin tarlan danin, hripui vanga SRH-a enkawl mekte chu Mizo vek, mipa 15 leh hmeichhia 21 an ni a, a naupang ber thla 8 mi niin, a upa ber kum 73 a ni. Mi pali chu ICU-ah enkawl an ni a, ngaihtuahawm erawh an ni lo. Mi dang zawng chu ward-ah enkawl an ni.

Loneitute zirtir

Aizawl district-a Agriculture department chuan nimin khan 'Ei leh bara intodelh' tih thupui hmangin Muallungthu community hall-ah awareness campaign an buatsaih a, thil pawimawh hrang hrang loneitute an zirtir. Covid-19 avangin nakkum lamah ṭàm thleng palh thei a nih avangin, nasa lehzuala ṭan lak a ngaih thu

an tarlang.

DAWNTISEI

International Solar Alliance president India

India chu International Solar Alliance (ISA)-a president atana thlan nawn a ni a, kum hnih chhung atan co-president turin France chu thlan a ni bawk.

October 14 khan International Solar Alliance assembly virtual meeting neih a ni a, member ram minister 34 an tel. He hunah hian India chu president ni tura thlan chhunzawm a ni ta a ni.

Hei bakah hian region pali aṭangin ISA vice president pali thlan a ni bawk a, Asia Pacific region aṭangin Fiji & Nauru, Mauritiemus (African region), UK leh Netherlands (Europe and other region), Cuba leh Guyana ramte chu Latin America and Caribbean region aṭanga thlan an ni.

Assembly-ah hian Coalition for Sustainable Climate Action chungchanga ISA-in private leh public corporation a thawhpui dan tur, ISA seretariat-in a duan chu pawm a ni.

He hunah hian president, India Power and New and Renewable Energy Minister, R.K. Singh chuan a chhe zawnga khawvel sik leh sa inthlakna kawnga chhawmdawl hna thawktu ISA member ramte chungah an inpekna avangin lawmthu a sawi.

SA assembly vawi thumnaah hian minister Singh chuan khawvel puma electricity 2.8% chu ni zung atanga kawlphetha (solar energy) lak a nih thu sawiin, tun anga ni zung aṭanga kawlphetha kan siam chhuak thei zel a nih theih chuan kum 2023-ah chuan ni zung chu khawvela kawlphetha siam chhuahna atana pawimawh berte zinga mi a ni ang, a ti.

Share this Post

Login to comment

No Comments