India chuan Nilaini khan Palestinian raltlante ṭanpui nan United Nations Relief and Works Agency (UNRWA) for Palestine Refugees-ah US dollar maktaduai khat a pe. 

Palestine-a India palai Sunil Kumar chuan UNRWA hnenah raltlante ṭanpuina tur hi a hlan a ni. Hei hi kumin chhunga India-in sum a pek ṭum hnihna  a ni a, UNRWA tana USD maktaduai 5 pek a tiam aṭangin USD mtd 3 a pe tawh a ni. 

Sunil Kumar chuan raltlan mangangte ṭanpuina kawnga UNRWA hnathawh chu ropui a tih thu sawiin, India chuan Palestinian raltlante a ṭanpuina  kawngah theihtawpin a pui zel dawn a ni, a ti. 

UNRWA-a Director of Communications, Sami Mshasha chuan India chu Covid-19 vangin ram economy lamah leh kawng hrang hranga harsatna tawk mah se, Palestine raltlante chu a theihnghilh lo a ni, tiin a sawi. 

Ṭanpuina sum pek hi Palestinian raltlante hnena zirna, healthcare, chhawmdawlna leh social service pekna atan hman a ni dawn. India chuan UNRWA  hnenah hian  kum 2018 leh 2019 khan USD mtd 5 ve ve a lo pe tawh bawk. 

Kumin June thlaa UNRWA puala virtual ministerial pledging conference neihah khan minister of state for external affairs V Muraleedharan chuan kum hnih chhungin India chaun UNRWA tan USD mtd 10 a pek tur thu a puang. 

United Nations General Assembly-in kum 1949-a a din, UNRWA hian Jordan, Lebanon, Syria, West Bank leh Gaza Strip-a Palestinian raltlan mi maktaduai 5.6-te ṭanpui leh chhawmdawl hna a thawk mek a ni. 

Share this Post