Prime Minister Office (PMO) in assets declaration a tihchhuahah, prime minister Narendra Modi-a hausakna chu nikum aiin cheng nuai 36 in a pung. 

PM thil neih zat tarlanna thar berah hian June 20, 2020 thlenga a thil neih hlut zawng chu cheng vaibelchhe 2.85 a ni a, nikum hemi hun anga a thil neih hlut zawng chu Rs vbc 2.49 a ni thung. 

Modi-a hausakna punna chhan hi kum 2019-a bank deposit Rs nuai 3.3-a punna leh  investment cheng nuai 33 hu a neih vang a ni. A thil neih zinga khawih chet theih, movebale assets hlut  zawng chu Rs vbc 1.75  hu a ni a, loan a la lo a, a mimal hmingin motor a nei lo bawk. Rangkachak zungbun pali, gram 44-a rit, Rs nuai 1.5 man a nei a, Gandhinagar-a Sector-1-a ram square feet 3,531-a zauah joint owner a ni bawk. 

Assets declaration-ah PM hian pawisa fai Rs 31,450 kawlin, bank balance Rs 3,38,173 a nei a, SBI Gandhi­nagar NSC branch-ah Bank Fixed Deposit leh MOD balance Rs 1,60,28,939 a nei a, National Savings Certificates (NSC) Rs 8,43,124 hu a nei tel tih tarlan a ni. 

Hetih lai hian union home minister Amit Shah hausakna erawh nikum aiin a tlahniam. Amit Shah thil neih hlut zawng hi kumin June thla thleng khan Rs vbc 28.63 a ni a, nikum khan Rs vbc 32.3 a ni thung. 

PMO declartion-in a tarlan dangin, Amit Shah hian immovable property 10, Rs vbc 13.56 hu a nei a, pawisa faiin Rs 15,814, bank balance leh insurance Rs vbc 1.04, pension policies Rs nuai 13.47 hu, fixed deposit scheme-ah Rs nuai 2.79 leh tlereuh Rs nuai 44.47 hu a nei bawk. 

Share this Post