Khaw lum avanga emergency puang turin Rajasthan High Court-in sorkar laipui a nawr

Rajasthan High Court chuan India rama khaw lum nasa lutuk avangin mi 100 chuang an thih tawh thu leh, India ram khawpui ṭhenkhatah chuan khaw lum zawng chu 45 degree celcius aiin a sang zawk niin an sawi a, hei vang hian sorkar laipui chu national emergency puang tura a duh thu a tarlang.

Rajasthan hi khaw lum lutuk tuar nasa ber pawl an ni a, High Court chuan thuneitute chu khaw lum avanga mipuite tawrhna titlem tura hmalakna nei lo niin a sawi. "Khaw lum avanga khaw chin danglam nasa lutuk chu mipuiin an tuar a, thla liam ta chhung khan mi 100 chuangin nunna an chân phah a ni. Ruahmanna hran siam kan nei si lo a, tunah hian nasa taka hmalak a nih loh chuan kan thlahte dam khaw chhuahna tur kan tichhe vek dawn a ni," a ti.

High Court hian Rajasthan sorkar chu khaw lum avanga nunna chânte chhungte zángnadawmna ruahman tura hriattir bawkin, khaw lum chu India pawhin nakin zel atan khuarel chhiatna zinga a chhiar tel a ngai a ni, a ti bawk. Sorkar laipuiin hetiang a ti a nih chuan, tuilian, cyclone leh khaurel chhiatna dang atana hman tur pawisa ruahman pawh khaw lum avanga chhiatna thlengah hian hman theih a ni dawn niin a sawi.

Khaw lum avangin Odisha-ah mi 14 an thi

Odisha-a Sundergarh district-ah chuan Ningani khan khaw lum zual nasa lutuk avangin mi 14 an thi niin thuneitute chuan an tarlang. Mitthi zinga 10 hi Rourkela Government Hospital-ah an thi a, mi pali dangte hi Sundargarh district hospital-ah an thi bawk.

Rourkela Additional District Magistrate, Ashutosh Kulkarni chuan Rourkela chu a lum belh nasat tawh thu leh, Odisha khawthlang lam pawh a lum belh zel nia sawiin, hei vang hian mitthi pawh an awm phah a ni, a ti. India Meteorological Department (IMD) tarlan danin, Odisha-a hmun 19-ah chuan khaw lum lam hi celcius degree 40 aia sang a ni reng a ni.

High Court-in khaw lum avangin ukilte kawrfual hak loh phal

Khaw lum lutuk avanga ruahmanna siam ṭhat zingah, High Court pathum chuan ukilte chu tun nipui chhunga an kawrfual leh coat hak ṭhinte hak loh phalna an tichhuak.

India rama ukilin kawrfual dum an hak ṭhin hi 1961 aṭanga chin ṭan a ni a, kuminah hian khaw lum lutuk avangin High Court pathum chuan hak loh phalna an siam a ni. Supreme Court pawhin ram puma ukilte tan he kawrfual dum hak loh phalna hi siam se an duh thu an thlen bawk.

Khaw lum avang hian Delhi court pakhat judge chuan thubuai ngaihtuah lai mek pakhat chu a hun a sawn phah bawk. Delhi-ah hian kar tir khan khaw lum nasat ber lai thlengin, clecius degree 50 a kai pha a ni.