India ramah Covid-19 kai dam tawh 78.28% an awm

India ramah Covid-19 hripui nasa takin hluar zel mah se enkawl dam leh tawh pawh an tam hle. Hripui kai nuai 49 chuang lai mai an awm tawh a, mi nuai 38 chuang dam leh tawhin mi sing riat chuang an thi tawh bawk a, mi nuai kua velin hri an la kai thung.

Maharashtra chu hri kai tamna ber state a la nih chhunzawm zel a, Andhra Pradesh, Tamil Nadu, Karnataka leh Uttar Pradesh-te'n an dawt a ni.

Darkar 24 chhunga India dinhmun

Ministry of Health and Family Welfare-in nimina report an tihchhuahah chuan Thawhṭanni khan hri kai hmuh chhuah thar mi 83,809 lai an awm leh a, ni nga chhung lai a zawna ni khata hri kai hmuh chhuah thar sing kua chuang an awm hnuah nimin report-ah hian tlemin a tlahniam ve leh hret.

Darkar 24 chhungin dama puan mi 79,292 an awm leh a, mi 1,054-in an thihpui leh bawk a ni. Ni khata dama puan zat hi 70-80k inkar velah a awm tlanpui a, thi zat pawh hi ni eng emaw zat chhung chu sang an chuang tawh a ni.

India dinhmun

Covid-19 kai tam ram pahnihna India ramah hian nimina sorkar report tihchhuah thleng khan mi 49,30,236-in hri an kai tawh a, enkawl dam 38,59,399 an awm tawh bawk. Mi 80,776 lai maiin an thihpui tawh a, 9,90,061 chuan hri an la kai mek.

India rama recovery rate chu 78.28% a ni tawh a, hri kai mek rate chu 20.08% niin thihpui rate chu 1.64% a ni thung.

ICMR report

Indian Council of Medical Research chuan nimina report an tihchhhuahah Thawhṭanni khan sample 10,72,845 an endik tih an tarlang a, hri len ṭantirh aṭanga nimin thleng khan sample 5,83,12,273 an endik tawh a ni.

ICMR han sample endikna tur laboratory pawmpui 1,726 an nei tawh a, chung zinga 1,053 chu sorkar laboratory niin 673 chu private laboratory a ni thung. 



Share this Post

Login to comment
No Comments