Vanglaini - Maldives ram hnenah loan USD mtd 250 puk tir dawn

KHAWTHLIR

Ramri vengtu zinga mi a thi

C Lalṭanpuia (46) s/o C Sualneka, Champhai Vengthlang chu August 12, Nilaini zan dar 7 khan rannung seh natna (scrub typhus) vangin a thi a, nimin khan vui a ni. A nupui H Lalnuntluangi leh an fate pali a kalsan. Thu dawn danin, C Lalṭanpuia hi Champhai Vengthlang YMA president a ni a; Covid-19 laka invênna atana ramri vennaah hun eng emaw chen a riak lut ve a, chuta ṭang chuan a thihpui tak rannung natna hi a kái a ni.

SRH-ah mi 59

State Referral Hospital-ah Covid-19 vei mi 59 enkawl mek a ni a, niminah dah luh thar an awm lo. Mi 59 zinga pakhat chu ICU-ah la awm zelin, ṭhat lam a pan a, Isolation Ward-a awm mi 55 zingah khawsik sang vak lo nei pahnih an awm a, ngaihtuahawm an ni lo. SICU-ah mi pathum an awm bawk.

1,717 khung hrang

August 12, 2020 thleng khan Mizoram hmun hrang hranga quarantine facility-ah khung hran mi 1,717 an la awm. Khung hrante chu Aizawl district-ah mi 853, Lungleiah 159, Siaha-ah 44, Champhaiah 42, Kolasib-ah 344, Serchhipah 91 Lawngtlaiah 89, Mamitah 54, Saitualah 17, Khawzawlah pakua leh Hnahthial district-ah mi pakhat an la awm a ni.

Antigen Test-in endik

Champhai Chief Medical Officer office chuan DC thupek bawhzuiin nimin khan frontline worker, sumdawng leh muṭia/porter-te'n Covid-19 an vei leh vei lo Rapid Antigen Test hmangin an endik a, hripui vei hmuh chhuah a ni lo. Champhaiah hian Rapid Antigen Test hi July 22, 2020-ah hman ṭan a ni a, mi 150 endik tawhin, Covid-19 vei mi pali hmuh chhuah tawh a ni.

Thisen pe

KṬP, Bethlehem Venglai Branch chuan nimin khan thisen pek rûnpui an huaihawt a, Aizawl Civil Hospital tan thisen unit 53 an pe a, a petute mipa 43 leh hmeichhia 10 an ni.

Sorkar chawlh

GAD chuan nimin khan notification tichhuakin, village council leh local council inthlan ní - August 27, 2020 chu inthlanna tur district-ah sorkar chawlh atan puan a ni tih a tarlang. Chawlh puan hi mipuite'n vote an thlak ṭheuh theihna atana tih a ni a; inthlanna tur - Aizawl, Lunglei, Champhai, Kolasib, Serchhip, Mamit, Saitual, Khawzawl leh Hnahthial district-te a huam a ni.

DAWNTISEI

Maldives ram hnenah loan USD mtd 250 puk tir dawn

External affairs minister Dr S Jaishankar chuan Maldives ram puihna turin soft loan, US dollar maktaduai 250 puk tir a ni dawn tih a sawi.

Covid-19 leng vanga Maldives ramin sum lama harsatna a tawh mek puihna tur a ni. Sorkar laipui chuan Maldives nen chuan ram inṭhianṭha tak an ni tih sawiin, sum lama harsatna a neih mek puihna tur hi siam a ni dawn tih thla hmasa lam khan a lo sawi tawh a ni. A hmain currency swap arrangement kaltlangin USD maktaduai 400 hmangin a lo pui tawh bawk. Hei bakah hian Operation Sanjeevani hnuaiah damdawi ton 6.2 leh food item ton 600 a lo pe tawh bawk a ni.

Share this Post

Login to comment

No Comments