Salah leh Klopp boruak a chhia!

Premier League champion tum zinga mi Liverpool chu West Ham United nen 2-2 in an inhnehtawk a, nomawi an beiseina a thamral tluk a ni ta - inkhel zawh dawn loh a hnu lamah Jurgen Klopp leh Mohamed Salah te chuan buaina an nei zui.

Inrinni zan inkhelah Hammers tan Jarrod Bowen-a'n goal hmahruai a khung a, mikhual lamin Andy Robertson hmanga an sut bakah Cody Gakpo-a shot chu Angelo Ogbonna, Tomas Soucek leh Alphonse Areola ten lo tawkin anmahni lamah a lut.

Reds-in point thum hmuh an beisei hman viau a, goal khung belh tumin Salah leh Darwin Nunez te chu lut turin mual sirah an inbuatsaih mek a, hetih lai tak hian Michail Antonio chuan tauh lutin si phurh a sut daih.

Khelmual sirah Klopp leh Salah te an inhnial a, a hnu deuhah phei chuan Nunez a inrawlh hial. Inkhelh banah Klopp chuan an inhnialna chungchang hi a sawi zui duh ta lem lo.

Salah pawhin zawhna a dawng - Egypt international forward chuan, "Ka sawi chhuah chuan boruak ṭha lo zawk a thleng ang," a ti. Manager leh player inkar a ṭha lo tih chu zep tur a awm lo, hun tlemte an neihah hian an siamṭha thei ang em tih chu zawhna a ni.

Tun season tawp rualin Klopp-a'n Anfield a chhuahsan dawn a, a hun hnuhnung a hmang mek. A player zinga hlawh tam ber Salah hma hun pawh a chiang lo nghala ngaih a ni a, nipui bazar lai khan Saudi Arabian club nen sawizawm a lo ni tawh bawk.

EPL champion pui theitu Klopp tan Reds hian league nomawi chawi ngei an duh a, chutihrualin an boruak leh dinhmun thlir chuan thil harsa a ni ang. Ṭha leh ropui taka hun hnuhnung hman tum mah se League Cup nomawiah an lungawi mai a ṭul tawh niin a lang.