Hri kai hmuh chhuah thar 66,999 awm Hmuh chhuah tam ber ni a thleng leh

India ramchhung hmun hrang hrangah hri kai hmuh chhuah thar 66,999 an awm leh tih Ministry of Health and Family Welfare chuan nimin khan an tarlang a, hei hi ni khata hri kai hmuh chhuah thar tam ber ni a ni leh a ni.

Hri len ṭantirh aṭanga nimin thleng khan hri kai hmuh chhuah 23,96,637 an awm tawh a, khawvel ram hrang hrang zinga hri kai tam ram pathumna kan la ni chhunzawm zel. 

Nimina MoHFW report tihchhuah tharah hian hri kai tawh dama puan 56,383 an awm leh a, hei nen hian enkawl dam 16,95,982 awm tawhin recovery rate hi 70.77% a ni tawh.

Thihpui 942 lai an awm leh a, hei nen hian hri len ṭantirh aṭanga nimin thleng khan India ramah Covid-19 vanga thi 47,033 an awm tawh a, hri kai mek 6,53,622 an la awm bawk. 

Hri kai mek rate hi 27.27% a ni a, thihpui tawh rate hi 2% aiin a tlem tih sorkar thuchhuahah chuan an tarlang bawk.

Sample test tam ber ni

Indian Coucil of Medical Research (ICMR) chuan nimin khan Covid-19 sample 8,30,391 lai an endik a, hei hi ni khata endik tam ber ni a nih bakah nuai 8 chuang test tlin a nih ṭum khatna a ni. Nimin thleng khan ICMR hian sample 2,68,45,688 an endik tawh.

Ramchhung hmun hrang hrangah laboratory pawmpui 1433 an nei tawh bawk a, sor­kar laboratory 947 leh private laboratory 486 an pawmpui tawh a ni. 

Maharashtra-ah hri lengin ziaawm lam a pan lo

India rama State/UT zinga hri leng tamna ber Maharashtra-ah chuan nimin report-ah hri kai hmuh chhuah thar 12,712 an awm leh a, hri len ṭantirh aṭanga nimin thleng khan hri kai 5,48,313 an awm tawh. Hetihlai hian enkawl dam pawh an tam tawh hle a, 3,81,843 lai enkawl dam ni tawhin 18,650-in an thihpui tawh a, hri kai mek 1,47,820 an la awm.

Tamil Nadu-ah chuan hri kai 3,14,520 an awm a, heng zinga 52,929 hian hri an la kai mek.

Andhra Pradesh-ah pawh hri kai 2,54,146 an awm tawh a, heng zinga 1,61,425 hi dam leh tawhin 90,425 chuan hri an la kai mek a, 2,296-in an thihpui tawh bawk a ni.



Share this Post

Login to comment
No Comments