United an huaisen tawk lo - Keane

Manchester United captain hlui Roy Keane chuan Louis van Gaal chu a club hlui manager ni chhunzawm zel turin duh mah se player-te erawh an huaisen tawk loah a puh thung.

Kum 44-a upa Roy Keane chuan, "Sir Alex Ferguson-a hmunruak luah kha thil awl ai a ni lo a, David Moyes tan pawh khan a harsa a ni. Ka ngaihdan chuan Van Gaal hian Sir Alex aiawhtu nih a duh a, a tum bawk avangin United hian an chhawr zui zel ka beisei," tiin Alex Ferguson-a hmunruak thlak zawh mai theih a nih loh thu a sawi.

FA Cup nomawi pawimawhna sawi langin Roy Keane chuan, "United tan palina nih hi a harsa tawh dawn a, FA Cup nomawi erawh an ban phakah a awm. Van Gaal hian nomawi a chawi pui a nih chuan rilru thlamuang takin awm se a contract la neih kum khat dang hi hmang zo turin ka duh. Manager ten hun harsa an tawk reng hmuh hi ka duh lo," tiin a sawi.

Roy Keane hian Sunderland leh Ipswich Town a enkawl tawh a, Ipswich hian an ban tawh avangin Republic of Ireland midfielder hlui hian manager dinhmun a hrethiam hle.

United team chungchang sawi-in Keane chuan, "Chelsea hi nakkumah chuan an ṭha zawk dawn a, Man City-in manager thar an nei dawn. United chuan loh theih loin player thar an lakluh a ngai a, tunah chuan player huaisen pahnih emaw pathum chu a mamawh a ni. Tunah chuan an huaisen tawk lo," tiin nomawi chawi leh tur chuan inlak belh an mamawh thu a sawi.