Vanglaini - Rajya Sabha Ethics Committee chairman atan Shiv Pratap Shukla ruat

KHAWTHLIR

Lusûn khawhar

Liankunga (69), IAS (Rtd.) h/o Zalianthangi, Chaltlang, Aizawl chu nimin chhun dar 12:17 khan zunthlum natna vangin a thi a, nizan khan lumen niin, vawiin chawhma dar 11-ah vui a ni ang. Liankunga hi February 14, 1951-ah Khawbélah a piang a, fa pathum leh tu pali an nei. Mizoramah hna hrang hrang a thawk tawh a, kum 1981-ah police SI-ah a inziak tling a, kum 1982-ah Account & Treasury-ah assistant auditor-ah a inziak tling leh. Kum 1985-ah IAS-ah a inziak tling a, a hmain IAAS-ah tling bawk. IAS-ah hian Bihar cadre a ni a, Bihar sorkara principal secretary a nih laiin May 31, 2017-ah a pension a ni.

YMA din remti

YMA Central Executive Committee (CEC) nimina ṭhukhawm chuan, YMA branch thar pathum - Kharzawl branch (Serlui group), Halam Punjee branch (Zampuimanga group) leh Kolasib Venglai East branch-te din an remti. YMA branch pathum din thar a nih chuan YMA branch 811 a awm tawh ang.

CM-in thawh

Chief minister Zoramthanga chuan Covid-19 dona atan July-a a hlawh (basic pay) aṭanga 60% (Rs. 48,000) chu nimin khan Chief Minister's Relief Fund-ah a thawh.

Sample 100 en

ZMC Covid-19 Laboratory-ah nimin khan mi 100 velte swab sample endik a ni a, zan lamah result a chhuah beisei a ni. Sample endikte chu SRH-ZMC-a awmte bakah, Aizawl, Mamit leh Champhai aṭanga dawnte a ni.

Covid-19 vei mek ICU-ah 2 an awm

State Referral Hospital-ah nimin khan Covid-19 vei mi pathum leh rinhlelh thilah mi pathum dah luh thar an ni. SRH-ah hian Covid-19 vei mi 17 enkawl mek an ni a, ICU-a mi pahnih, SICU-ah mi pakhat leh Isolation Ward-ah mi 14 an awm. ICU-a awm pakhat zawk ventilator hmantir mek chuan hma a sawn hret a, Isolation Ward-a awm zingah khawsik leh thawhah nasa vak lo nei mi pali awm mah se, ngaihtuahawm an ni lo tih, SRH-ZMC Bulletin chuan a tarlang.

DAWNTISEI

Rajya Sabha Ethics Committee chairman atan Shiv Pratap Shukla ruat

Bharatiya Janata Party (BJP) MP Shiv Pratap Shukla chu Rajya Sabha Ethics Committee chairman atan ruat a nih thu Rajya Sabha Secretary-General Desh Deepak Verma chuan parliamentary bulletin-ah Ningani khan a puang.

Rajya Sabha chairman M Venkaiah Naidu chuan tunhnai khan Ethics Committee member atan hian Tiruchi Siva (DMK), Dr K Keshava Rao (TRS) leh V Vijayasai Reddy (YRS Congress) MP-te chu a lo ruat tawh bawk a ni. Rajya Sabha Ethics Committee member awm thei zat hi 11 a ni a, heng zingah hian chairman pawh a tel.

Member dangte chu Anand Sharma (Congress), Ram Gopal Yadav(Samajwadi Pary), A Navneet Krishnan (AIADMK), Derek O'Brien (All India Trinamool Congress), Ram Chandra (Janta Dal United) leh Prasanna Acharya (Biju Janta Dal) te an ni.

Ethics Committee hian MP zingah nunchang mawi lo leh an awm dan dik lo report chu a ngaihtuah ṭhin a ni.

Share this Post

Login to comment

No Comments