Hmuhsitna tawk Vinicius mittui a tla - inkhelh loh mai a duh!

Real Madrid winger Vinicius Jr chuan, a vun rawng vanga hmuhsitna a tawh fo avangin inkhelh nuam a tih loh tawlh tawlh thu a sawi chhuak a, he thu a sawi lai hian a mittui a tla hial.

Season hmasa ringawt khan Vinicius hian vun rawng vanga inhmuhsitna vawi tam a tawng a, Real Madrid forward chunga thil thleng sorkar thuneitute hnena ngaihtuah tura La Liga-in an thlen zat chu vawi 10 a ni!

Tukin zing dar 2:00 khan Brazil leh Spain te chuan friendly match khelin, an result kan hre hman lo a, he inkhel atana press conference an neihnaah Vinicius hian a hun tawn hi a sawi chhuak - ram pahnih inkhel hi chi inthliarna duh lohna lantirna chi khat a ni a, a thupui atan 'One Skin' tih chu an hmang.

Ka tlawm dawn lo

Vinicius hian a vun rawng vanga deuna leh hmuhsitna tawk nasa viau mah se, Spain chu chhuahsan mai tumna a neih loh thu a sawi a, Real Madrid fans tan hriat a nuam ang - Vinicius a cham zel dawn.

Brazilian forward chuan, "Spain chhuahsan lam hi ka ngaihtuah ngai lo. Spain hi chhuahsan ni ta ila, ka vun rawng vanga min hmusit ṭhintute duh ang tak ka pe tihna a ni dawn asin," a ti a, hmuhsitna karah pawh tlawm a tum lo.

Vinicius chuan sawi chhunzawmin, "Spain-ah hian ka cham zel dawn a, tichuan, chi inthliarna tilang ṭhintute hian min hmu reng thei dawn a ni," a ti a, amah au el ṭhintute a ṭawng el ve thung.

Min thik!

Vinicius chuan, "Player, mahni nihna anga lang mai ṭhin ka ni a, Real Madrid tan khelin, nomawi tam tak kan chawi a, hei hi mi tam tak chuanin an hrethiam lo a ni," a ti a, a hlawhtlinna avanga huatna tam tak tawk a nih thu a sawi.

Kum 23 mi Vinicius hian an ram club Flamengo aṭanga a professional zinkawng zawh ṭanin, kum pawh a tlin hma, May 2017 khan Real hi inremna neihpuiin, July 2018-ah a zawm a, euro maktaduai 46 man niin, tunah chuan Real player langsar ber pawl a ni der tawh.

Real a pan hnuah hian inelna hrang hrangah match 253 khela goal 77 khungin, assist vawi 72 a nei a, La Liga (2), Copa del Rey (1), Spanish Supercup (3), Champions League (1), UEFA Super Cup (1) leh FIFA Club World Cup (2) ah te champion nomawi a chawipui tawh a, a sulhnu hi a nep lo hle.

Mahse maw...

Vinicius-a'n a tlawm mai loh tur thu leh, Spain-a a cham zel tur thu sawi mah se, mihring ve tho a ni miau a, a rilru a paukhauh thei reng bik lo. Brazil international chuan, "Ka duh chu nuam ti taka football khelh hi a ni mai a, mahse, a chang chuan a harsa ṭhin takzet.

"Football nuam ka tihna hi a bo tual tual a ni," a ti thlawt - kum 23 mi chauh a ni a, football khawvela club ṭha Real leh ram langsar Brazil tan a khel a, sum tam tak a hlawh a, nomawi tam tak a chawi tawh.

Mahse, chuti chung chuan Vinicius-a'n inkhelh nuam a tih loh tawlh tawlh thu a sawi - hei hian a vun rawng vanga hmuhsitna a tawh fo hrehawm turzia a pholang chiang hle.

Hmuhsitna chu

Vinicius hi midum player zingah hmuhsitna tawk ngun ber tia sawi theih hial a ni - tun hnaiah pawh a vun rawng vanga hmuhsitna hi a la tawp hleithei lo a, kar hmasa lawk pawh khan Osasuna nena an inkhelah auh el a ni.

He thil thleng hi Real chuan, inkhel enkawltu referee Juan Martinez Munuera chuan a match report-ah a tarlang lo niin an sawi a, an lungawi loh vangin referee chunga lungawi lohna an thehlut. Osasuna erawh chuan Vinicius auh elna chu awm ngei mah se, chi inthliarna lam hawi a nih loh thu an sawi.

Real hian March 15 khan Vinicius chunga thil thleng chungchangah tho thuneitute hnenah thubuai an lo theh lut tawh a, Atletico Madrid leh Barcelona fan-te chuan Champions League match-a Inter Milan leh Napoli an hmachhawn ṭumin, Vinicius deusawhna an chhak chhuak a ni.

A tam lutuk!

Vinicius hian tun hnaiah chi inthliarna lam hawia beih a tawk nasa malh malh hle. September 2022 khan Madrid derby-ah Atletico fan-ten lo au nawmnah tawhin, Atletico pawhin an fans ṭhenkhat chet dan an dem thu an lo sawi tawh a, he thubuai hi ngaihtuah mek a ni.

January 2023 khan Real training ground hnaiah Vinicius-a lem chu mi paliin an khai kang a, an pali hian kum hnih chhung stadium lut thei lo tura hrem an ni a, €60,001 (Rs. 54,25,350) chawitir an ni bawk. Nikum May thlaa Real leh Valencia inkhelh ṭumin fans ṭhenkhat chuan Vinicius hi au nawmnahin, fans pathum chu kum khat chhung inkhel en thei lo tur leh €5,000 (Rs. 4,52,105) chawi tura hrem an ni.

Kuminah pawh Vinicius deuna hi a awm chhunzawm zel - October thlaa Sevilla leh Barcelona nena an inkhelh ṭum te, tun thlatira Valencia nen an inkhelh ṭumtein Vinicius hi a vun rawng vanga auh nawmnah a lo ni tawh.