Vanglaini - PM CARES-a China company-te pawisa dawn vangin sorkar dem

KHAWTHLIR

IAS sîksawi

Mizoram sorkarchuan tun hnai khan IAS pathum a sîksawi. Serchhip DC Dr Lalzirmawia Chhangte chu secretary atan ruat a ni a, Printing & Stationery leh Fisheries department a chang ang. Siaha DC Bhupesh Chaudhary chu additional secretary atan ruat niin, Cooperation department a chang ang a, Aizawl additional DC Kumar Abhishek chu Serchhip DC a ni ang.

Mi pali dah lut

Covid-19 vei rinhlelh thilah nimin khan State Referral Hospital-ah mi pali dah luh thar a ni a, an zinga pahnih chu nimin khan swab sample laka endik nghal a ni a, he thu ziah lai hian result a la chhuak lo. Mi dang pahnih chu vawiinah endik an ni ang. SRH-ah hian Covid-19 vei mi 15 enkawl mek a ni a, Makeshift ICU-ah mi pakhat awmin, mi dang 14-te Isolation Ward-ah an awm.

Lungleiah Swab test

June 28, Pathianni khan Lunglei Civil Hospital laboratory-ah Truenat khawl hmangin swab sample 30 endik a ni a, June 27-ah sample 31 endik a ni bawk a; endik zawng zawngte'n Covid-19 an kai lo tih finfiah a nih thu sorkar thuchhuah chuan a tarlang. LCH laboratory-ah hian Pathianni thleng khan sample 299 endik a ni tawh a, sample pahnih chu Covid-19 positive angin a hmu a, ZMC-a endik nawnnaah positive pakhat zawk chu negative a ni tih hmuh a ni thung.

Hnathawh enfiah

Kolasib bialtu MLA K Lalrinliana chuan nimin khan a bial Diakkawn VC area chhunga MLA-LAD Fund, Excluded Area Grant leh Mizoram Finance Commission Grant hmanga hnathawh a hmunah kalin a enfiah a, MLA fund hmanga sak Neuva Section YMA Chawlhbuk chu a chung siam danah duhthu a sam loh thu sawiin, steel structure hmanga nalh zawk leh tha zawka siamtha tur leh estimate pawh siam tha leh turin a ti. K Lalrinliana chuan bial chhung mipuite chu MLA fund an ta a ni tih hria a, fund hmanga hnathawhte ngaihven a, enpui fo turin a chah.

DAWNTISEI

PM CARES-a China company-te pawisa dawn vangin sorkar dem

Congress chuan Pathianni khan Covid-19 dona tura pawisa thawhna, PM CARES-a China company; Huawei leh TikTok ten pawisa an thawhte sorkar laipuiin a lo pawm avanga an dem thu an tarlang.

Sorkar chuan eng vanga heng pawisa te hi la nge an nih tih Congress chuan an zawt a, an zawhna hi prime minister Narendra Modi-a chhan turin an phut bawk. "China hnen aṭangin cheng vaibelchhe 100 chuang sorkar laipuiin pawisa a la thei mai hi a mak a; China-in buaina a rawn siam lai meka heng tiang pawisa a dawng thei hi, sorkar chuan a chhanna a pek ngei a ngai a ni," tiin Congress thupuangtu Abhishek Singhvi chuan a sawi.

PM CARES-ah hian Huawei company chuan cheng vaibelchhe sarih a thawh a, TikTok hian cheng vbc 30 an thawh tih Singhvi chuan a sawi bawk. Paytm hi 38% chu China ta a ni a, Paytm hian PM CARES-ah hian cheng vbc 100 an thawh niin Singhvi chuan a sawi a, Xiaomi chuan cheng vbc 15 an pe niin a sawi bawk.

March 28 khan hripui leng dona atana hman tur bikin PM CARES hi siam a ni a, mi tam takin Covid-19 hri do nan pawisa an thehlut a ni. He fund-a pawisa lut leh chhuak hi mipuite hriata langtlang taka kalpui a nih loh avang hian sawisel a lo hlawh phah fo tawh bawk.

Share this Post

Login to comment

No Comments