Loneitu thihna avangin Punjab police-in thubuai an theh lut

Delhi pana loneitute'n nawrh an huaihawt laia Punjab leh Haryana inrina, Khanauri point-a loneitute leh Haryana police-te innawr buai laia nunna chan, Shubhkaran Singh thihna chungchangah Punjab police-te chuan tualthah thubuai an theh lut.

Khanauri-a loneitute leh Haryana police-te hi kar liam ta, February 21 khan innawr buaiin, buaina chhuakah hian loneitu pakhat, Shubhkaran Singh chu a thi a, a thih aṭang hian ni sarih zet a liam tawh a ni. Singh-a thihna avang hian loneitu kawng zawhte hian an kawng zawhte chawl lailawkin, black day-te an lo hmang tawh a, Punjab sorkar hnenah hian thubuai theh lut turin an nawr bawk an ni. Hei vang hian Punjab police-te chuan Nilaini khan Patiala-a Patran police station-ah India Penal Code (IPC) section 302 (thualthah), section 114 (fuihtu awma tualthah) hmangtein thubuai an theh lut a ni. Thubuai hi Shubhkaran Singh-a pa hminga theh luh a ni a, rinhlelh puh pawh an nei lo niin an tarlang.

Loneitute hian Singh-a thihna chungchanga thubuai theh luh a nih hma chuan a ruang hi post-mortem pawh an phal lo a, Nilaini thleng khan a ruang hi Patiala-a Rajindra hospital-ah dah a la ni. Sorkarin thubuai theh luh a nih thu a puan hnu hian Singh-a ruang hi nimin khan vuina hun hmanga hal ral a ni ta a ni. Punjab chief minister, Bhagwant Mann chuan Shubhkaran Singh-a thihna avang hian a chhungte tan zângnadawmna Rs. vbc. 1 pek a nih tur thu a lo sawi tawh bakah, a farnu tan sorkar hna pek a lo tiam tawh bawk a ni.