Himachal Pradesh-ah Congress MLA paruk disqualify an ni

Himachal Pradesh-a Rajya Sabha inthlan neih zawh takah Himachal Pradesh assembly-a rorel lai, Congress party MLA parukin BJP candidate an vote avangin assembly speaker, Kuldeep Singh Pathania chuan house aṭanga disqualify an nih thu a puang.

Thawhlehnia Himachal Pradesh aṭanga Rajya Sabha seat pakhat atana inthlanna neihah khan heng Congress MLA-te hian party thuchhuah anga an party candidate vote tur tih chu zawm loin, eptu party, BJP candidate an vote a, BJP hian hnehna an chang a ni. Hei vang hian assembly speaker hian anti-defection law hmanga MLA parukte hi disqualify an nih thu a tarlang.

Hetih lai hian BJP chuan MLA parukte chu an huaisenna avanga chhuanawm an tih thu an sawi thung a, Congress sorkar an rintawk tawh lohna an tilang ngam chu thil dik tak a nih thu an sawi.

Himachal Pradesh assembly-ah hian seat 62 awmin, Congress hian MLA 40 neiin sorkarna an siam a, mahse, Rajya Sabha inthlanna neihah hian Congress MLA paruk leh independent MLA, Congress thlawptute chuan BJP candidate an vote avangin BJP candidate Harsh Mahajan chu a tling ta zawk a ni. Congress hian tun dinhmunah MLA 34 neiin majority an la nei tho a, budget session neih mekah MLA paruka an kiam avang hian BJP hian sorkar rintawk lohna motion pu lut mah se a tlang lo a ni. Speaker hian nungchang mawi lo avangin assembly aṭang hian BJP MLA 15 suspend ve bawkin, Nilaini khan budget pawm a ni bawk.