OPS hman phûtin sorkar hnathawkte'n nawrh an tum

Sorkar laipui hnuaia sorkar hnathawk, trade union leh pawl hrang hranga tel mi nuai 28 te bakah, railway, central public sector undertaking leh state sorkar hnuaia zirtirtute chuan Old Pension Scheme (OPS) hman leh phutin May 1 aṭang hian tiam chin awm loa nawrh huaihawt an tum.

Sorkar laipui hnuaia hnathawk, nawrh huaihawtnaa tel turte hi an vaiin mi vbc. thum chuang an ni a, New Pension Scheme (NPS) hman mek chu titawp a, OPS hmang leh turin sorkar laipui nawr an tum a ni. Nawrh huaihawt tumna hi Joint Forum For Restoration of Old Pension Scheme (JFROPS) buatsaih niin, nawrh huaihawtna tur chungchang hi March 19-ah a kaihhnawih pawl hrang hrangte hnenah hriattir an tum thu an sawi.

JFROPS convener leh All India Railwaymen’s Federation (AIRF) general secretary ni bawk, Gopal Mishra chuan nawrh huaihawt an tum thu hi puangin, hei hi an pawl leh sorkar laipuiin OPS hman chungchanga an inbiakna a tawp avang leh inremna an neih theih loh vang niin a tarlang. Mishra hi cabinet secretary kaihhruai, Joint Consultative Machinery (JCM)-a secretary ni lai a ni bawk. "OPA hman leh phut hian vawi tam tak kan nuar tawh a, Prime Minister leh Finance Minister hnenah pawh vawi tam tak lehkha kan thawn tawh. JCM meeting-ah pawh kan sawi lang fo tawh a, mahse, kan thil duh leh phutte ngaih pawimawh a ni lo a, sorkar hian min ngaihsak loh avangin loh theih lohin nawrh huaihawt zawnga kan chet a ngai ta a ni," tiin a sawi. Nawrh huaihawt tura thutlukna siam a nih hma hian sorkar laipui hnuaia railway bakah department hrang hrang leh PSU-a thawkte zingah vote lak a ni a, OPS hman leh duha nawrh huaihawt hi a tam zawkin an thlawp a ni.

Mishra hian sorkar laipui chu an thil phut chungchanga ngaihtuahna seng tawk loah puhin, hei vang hian sorkar ṭantu, Bharatiya Mazdoor Sangh (BMS) te chauh lo chu nawrh huaihawtnaah hian an tel dawn niin a sawi.