Second round-ah Gauff a tla

Tennis inelna Qatar Open khelh laiah, tunlai player hmuhnawm zinga mi seeded pahnihna Coco Gauff chu Katerina Siniakova hneh loin second round-ah a zinkawng a tawp.

World number 3 Gauff hi a khel ṭha lo hle, set hnihnaah phei chuan a zawnin game ruk ngawt a la lo, a khingpui Czech nula Siniakova lakah hian 6-2, 6-4 in a tlawm - Australian Open hnua a tournament khelh leh hmasak berah beisei a phak lo a ni.

Set khatna a hloh hnuin set hnihnaah beisei a nei a, 4-0 ngawtin hma a hruai hman. American tleirawl hi a tho chhuak leh ngei dawn ni pawhin a lang hman, mahse kum 27 mi Siniakova hi a tawp lamah a rawn tho chhuak.

Inkhel dangah Naomi Osaka erawh a chak thung, world number 1 hlui hian Petra Martic hnehin last 16 a inhlangkai. Fa a neih hnua tennis tharthawh lehtu Osaka hian 6-3, 7-6 (11-9) in hnehna a chang.

Kum 26 mi Osaka hian tennis a khelh thar leh chinah beisei a la phak lo ṭhin, a tan a harsat thu pawh a sawi hial. Tun inelna kal laiah erawh hma a sawn tih a chiang tawh a, midang tan hmachhawn a awlsam leh tawh dawn lo.

Khelh fuh leh fuh loh inthlak ngun ve tak Ons Jabeur erawh a chak lo. Seeded palina Jabeur hi Ukraine nula Lesia Tsurenko lakah 6-3, 6-2 in a chak lo. Australian Open pahnihna Zheng Qinwen erawhin Poland player Magda Linette chu 6-2, 2-6, 6-3 in a hneh.