Tatum hoin Celtics an chak

Jayson Tatum-a point 41 neih hmangin Boston Celtics chuan Brooklyn Nets chu 118-110 in an hneh - NBA regular season kal laiah vawi 42 an chak tlinna niin Eastern Conference hmahruaitu an ni.

Boston star Tatum hian rebound vawi 14 a la bawk a, hei bakah hian assist ṭum li nei bawkin hnehna an chan theih nan a thawhhlawk hle. Jaylen Brown-a'n point 19 a neih bakah Al Horford leh Derrick White ten point 16 ve ve an nei bawk.

Tun hnai an match hnuhnung pangah Boston hi an chak vek a, table lama anmahni hnaih bertu Cleveland Cavaliers aiin match sarihin an chak tam zawk, a thiam zual pariat inelna playoff ticket nei chiang turin an dinhmun an siamṭha ta hle.

Inkhel dangah hliam vanga buai mek Miami Heat chuan Milwaukee Bucks chu 123-97 in an sawp. Hliam vangin Jimmy Butler, Terry Rozier leh Josh Richardson te khel thei lo vek mah se player dang ten an khel ṭha rual, mi paruk ngawtin point 10 chuang an nei thei.