Hmeichhe footballer man to ber Kundananji

Zambian hmeichhe forward Racheal Kundananji chuan Spanish club Madrid CFF aṭangin US club Bay FC chu $860,000-in a zawm a, hmeichhe footballer man to ber a ni - mipa lamah chuan Neymar-a'n Barcelona aṭanga euro maktaduai 222-a Paris Saint-Germain a zawm kha man to ber a la ni reng a, hmeichhe lam nen a la inthlau vet vet hle.

Kum 23 mi Kundananji hian Madrid tan Liga F match 43 a khelhah goal 33 a khung a, hei hi American club hian hre ran chungin, hmeichhe footballer man to ber ni turin an lei ta a ni. Zambian forward hian kum li chhung atan contract a ziak a, kum khat dang pawhsei theih a ni.

Kundananji hi African footballer zingah, mipa a ni emaw, hmeichhia a ni emaw, world record transfer fee siam hmasa ber a ni a, a record hi inchhuanpui tham a ni. A hmaa hmeichhe footballer man to ber chu England midfielder Keira Walsh a ni a, kum 2022 khan Manchester City aṭangin Barcelona chu £400,000-in a zawm.

Zambia tan vawi 18 inlana goal 10 khung tawh Kundananji chuan, "Zambia-a kan mipuite chuan mak an ti hle ang tih ka ring a, chutihrual chuan min lawmpui khawp ang. Bay FC ṭantute chu an duh ang tak hmuhtir ka duh a, hlim taka ka inkhel leh goal khung lai an en theih ka beisei," a ti.

Kundananji hian Zambian club Indeni Roses aṭanga a professional zinkawng zawh ṭanin, kum 2019 khan Kazakhstan club BIIK Kazygurt a zawm a, Champions League a khel ṭan. Kum hnih hnuah Spanish top flight league club Eibar a zawm leh a, season khat hnuah Madrid a pan.

Madrid-ah hian a season hmasa berah league match 29 khelin goal 25 a khung a, tun season kal mekah league match 14 khelin goal riat a khung leh der tawh. A club thar Bay FC hian National Women's Soccer League-ah a vawi khat nan inelna an hmachhawn dawn a, player an lei hraw nghal hle.