Champion lai Man City an ṭha
Champions League-ah champion lai Manchester City chuan khualmualah Copenhagen chu 3-1 in an hneh a, second leg khelh tur la awm bawk mah se Pep Guardiola hote hian harsatna nei loin quarterfinal an luh a rinawm.
Parken Stadium-ah Man City tan Kevin de Bruyne-a'n goal hmahruai khungin Copenhagen-in Magnus Mattsson hmangin first half-ah vek an sut. Pep-a hoten first half leh second half tawp dawnah ve ve, Bernardo Silva leh Phil Foden te hmangin an khung belh a, 3-1 in an chak.
Goal khat ve ve
Kevin de Bruyne tel loin Man City an ṭha a, Belgian midfielder KDB tel chuan an ṭha lehzual. Minute 10-na lekah Phil Foden-a ball pek chu KDB hian goal-ah a chantir nghal.
KDB-a'n goal a khung theih nan Foden-a'n ball a la thla ṭha a, angle zim tak aṭangin goal ban hrulah a pet lut bawk. City an chungnung a, ball pawh an inpe kual nasa.
Goalkeeper Ederson chu, a pass duh dah deuh avangin hrem a ni a, chutihrualin box pawn aṭanga Magnus Mattsson ball pet erawh a kawh ṭha takzet. Copenhagen-in darkar chanve chhungin ball an chang ve mang lo a, mah se minute 34-naah 1-1 a ni.
City an danglam
Man City-in first half tawp hmain hma an hruai leh tho a, minute 45-naah KDB thawhrim rah chu Bernardo Siva-a'n a khung a, Portuguese midfielder finishing hi a tawih hle.
Second half-ah pawh City bawk an chungnung a, KDB-a'n tlarhnung a rum ṭhaih hmasa ber. Goal erawh injury time-ah a lut leh chauh a, Man City ball an inpek kual ṭhat avangin Copenhagen tlarhnung dem theih a ni lo.
Foden-a'n dinglam aṭanga ball la lutin box chhungah chiah De Bruyne nen wall pass hmangin Copenhagen tlarhnung an ṭhiat a, City goal thumna a khung. City tan Erling Haaland a khel tluan a, goal a khung lo. First half-ah Norwegian striker hian ball vawi ruk chiah khawih mah se City striker hian feet sarih leh a chanve vela sanga awm ball chu bicycle kick hmangin a pet hem mai!
City an kal zel
Man City hi UCL-ah match kaw chhung an chak zawn tawh a, Barcelona record an nih rual. Barca hian September 2002 - February 2003 leh October 2014 - May 2015 inkar khan ṭum hnih vawi kua an chak zawn tawh.
Chutihrualin Real Madrid (April 2014 - February 2015) leh Bayern Munich (April 2013-November 2013) te vawi 10 an chak zawn tawh a, German club tho hian record dinglai kawlin September 2019 leh November 2020 inkar khan vawi 15 chhung an chak zawn a ni.
City hi record dinglai khum thei an ni a, chutihrualin record dinglai khum tur chuan KDB, Haaland leh Foden te an chet ṭhat chhoh zel a ṭul dawn. KDB hian kumina a lo let hnuah ringawt vawi sarih assist a nei tawh a, goal hnih a khung tawh bawk.
Pep-a hote pawhin KDB awm hi an ṭhatpui tih a chiang a, match sarihah vawi sarih an chak a, goal 20 ngawt an khung. Man City hian February 17, Inrinni dar 11:00 hian Chelsea an mikhual ang.