Leipzig khelmualah Real Madrid an chak

Brahim Diaz-a'n goal mawi bik leh chhinchhiah ni reng tawh tur a khung a, Champions League round of 16 first leg-ah Real Madrid chu 1-0 in hnehnna a chanpui a, khualmualah RB Leipzig an hneh.

Leipzig tan Benjamin Seski chuan goal khat a khung veah inngai mah se video assistant refree rawn a nih hnuah a goal khung hi pawmsak a ni lo a, mahni mualah Real an ngam lo.

March 6-ah round of 16 second leg hi khelh leh tur a ni a, Santiago Bernabeu-ah a nih tawh dawn avangin German club tan tlang turin a harsa tawh dawn - thil thleng thei lo erawh a awm lo tih hriat a ṭha.

European champion vawi 14 ngawt ni tawh Real-in tun season-ah Spanish Super Cup champion nomawi an chawi tawh a, Copa del Rey-ah beisei tur an nei tawh lo a, La Liga-ah hmahruaitu ni mekin, an ke lehlamin Champions League quarterfinal an rap leh ta.

Ai kal Diaz!

Real Madrid-in hliam vangin an thiampuipa Jude Bellingham an chhawr thei lo a, a hmun ruakah Brahim Diaz a lut - mahse, Bellingham awm loh hlanin Diaz hian a hna tlin takin a thawk a, goal ṭha bik a khung.

Diaz hian Leipzig defender pahnih a bum hnuah, a duh thalin tlarhnung player dang a lam khum a, a duhnaah tak a dah emaw tih mai turin mawi zetin goal a khung. Player thiam bik ke aṭanga chhuak a ni.

Kum 24 mi Diaz hian hliam vanga inlan thei lo Bellingham goal khung lawm danin a goal khung hi a lawm zui a, English midfielder Bellingham chuan, "Lalpa leh...Brahim!" tiin a ṭhianpa goal khung hi social media lamah a lo lawmpui ve bawk.

Diaz chuan, "Bellingham hi ka ngainat zawng tak a ni a, a tir aṭangin kan inel nghal em em. Spanish ṭawng ka zirtir ṭhin a, world-class player a nih avangin a kianga khelh pawh nuam ka ti a, a ngainatawmna piah lamah hian pa ropui tak a ni," a ti.

Real an vannei

Leipzig khelmualah Real-in 50% ball an chang a, vawi 15 shot neiin vawi thum target-ah a kal - an hneh tak Leipzig hian Real aiin vawi khatin shot an nei tlem zawk a, mahse, an shot neih zinga pakua ngawt chu goal zawnah a kal thung.

Statistics aṭanga teh pawhin Real an vannei tih a lang a, inkhel ente pawhin an vannei tih an hmu. Benjamin Sesko ke hmui zan ni se inkhel tir lam minute 10 chhung khan hattrick a siam hman hial ang!

Mahse, Sesko hi offside vanga a goal khung pawm a nih loh bakah a chance neih a chhawr thei lo a, German club tan a uiawm vawng vawng ang. Real tan goalkeeper Andriy Lunin a che ṭha takzet a, Spanish club tan lawmthu hrilh mawlh mawlh tlak a ni.

Leipzig hian goal an chhuah hnuah pawh na takin Real hi an nawr a, mahse, Lunin a awm miau avangin Xavi Simons, Sesko leh Amadou Haidara ten an chance neih chu si phurh sut nan an hmang thei lo.

I tel lo chuan

Real tan Diaz a khel ṭha a, a hmuhnawm takzet. Chutihrual chuan Bellingham ngaihnawmna erawh lak bo theih a ni lo a, a bik takin first half-ah Real hian Jude tel loin awmze neia goal nawr an harsat a, an talbuai.

Bellingham hian Real tan Champions League match nga a khelh tawhah goal a khung loh pawhin assist a nei zel a, match nga aṭangin goal-a inrawlh hi vawi sarih ngawt a nei - a thawk chhuak hnem hle.

English midfielder hian tun season inelna hrang hrangah match 29 khela goal 20 khungin assist vawi riat a nei a, Real-in a tel loa tlarhmaa harsatna an tawk hi a awm lo hran lo.

Hetihlai hian Diaz-a khel enin, Real squad chhahzia hmuhtirin kan awm tel nghal a, Leipzig tan mahni muala chance neih ṭhat laia Real ngam loh hi a la pawi dawn chauh - Bernabeu-ah meuh chuan a dan a dang leh tawh dawn.

Fak ngai Diaz

AC Milan-a season thum zet loan-a a khelh hnua tun season-a kohkir Diaz hian tun season inelna hrang hrangah match 28 khelin goal riat a khung tawh a, assist vawi thum a nei. Mahse, match 28 zinga 16-ah chiah bul a ṭan a, match 11-ah lakchhuah a ni bawk.

A minute khelh zat aṭanga teh chuan Diaz hian minute 148 dan zela goal khung ang a ni a, attacking midfielder hnathawh atan chuan a chhe lo. Real coach Ancelotti chuan, "Milan-a hun a hman hnuah a chak sawt a, a mizia pawh a puitling sawt.

"A duh ang zana tam inkhel lo chungin season a hmang a, mahse, chance pek a nih chuan team tan a thawhhlawk zel. Zaninah pawh goal mawi bik a khung leh ta a ni," a ti a, a player chu a fak.

Italian coach chuan sawi zawmin, "Goal a khung hmaa ka ngaihtuah inhre duh maw? 'Ball kha hloh suh' tih ringawt ka rilruah a awm a, ka beisei ang ngeiin a hloh ta lo bawk," a ti a, a player chu a chhuang hle.