PM-in Pariksha Pe Charcha hun hmang

Prime Minister Narendra Modi chuan zirlaite nena inkawmna hun a hman ṭhin, Pariksha Pe Charcha chu nimin khan New Delhi-ah a vawi sarihna atan a hmanpui leh. PM Modi hian he hun hi zirlai naupangte zawhna chhan nan leh fuihna atan a hmang ṭhin a ni.

Pariksha Pe Charcha chu PM Modi chuan a tan pawh exam ang deuh a nih thu sawiin, nu leh pate chu an fate exam report card an thlir ṭhin dan chu thlak turin a chah. Zirlai naupangte chuan midang ni loin anmahni hmasawn zawk nan anmahni chauh an inel chu a pawimawh thu a sawi. Zirlai nu leh pate bakah zirtirtute chu hetianga naupang tana rilru leh inelna hrisel a awm theih nan an pawimawh thu a sawi bawk.

Prime Minister hian zirlaite tan stress chi thum a awm thu sawiin, mahni insiam chawp stress bakah ṭhiante avanga stress leh nu leh pate thlen stress a awm theih bawk thu a sawi a, zirlaite chu mahni ko tirit a, tum sang tak insiam nghal mai loin, muangchanga hmasawn thei tur zawka ngaihtuahna seng thiam turin a fuih a, India ram hma hun chu an kut awm a ni, a ti.

Pariksha Pe Charcha hi Ministry of Education buatsaih a ni a, kum ruk chhung kalpui tawh niin, Covid-19 avangin ṭum khat online-a neih a ni. Pariksha Pe Charcha-a tel tur hian MyGov portal-ah inziah luh theih a ni a, kuminah hian zirlai leh zirtirtu bakah, nu leh pa zawng zawngte nen, mi vbc 2.26 vel an inziak lut niin an tarlang. Nimina Pariksha Pe Charcha hun hi Bharat Mandapam-ah hman niin, state leh UT tin aṭangin zirlai pahnih leh zirtirtu pakhat zel an tel a ni.