SC-in Maha Speaker hnenah thutlukna siam hun pek belh

Supreme Court chuan Maharashtra speaker, Rahul Narwekar chu Maharashtra-a rorel lai, Ajit Pawar-a kaihhruai Nationalist Congress Party (NCP) MLA te ban tura Sharad Pawar-a kaihhruai Nationalist Congress Party (NCP) ngenna siam chungchanga thutlukna a siam turah hun pek belhin, a hmaa January 31, 2024 thleng hun pek chu February 15, 2024 thleng a pawhseisak.

Maharashtra-ah hian NCP hi nikum khan inṭhenin, Ajit Pawar-a kaihhruai NCP hian BJP thawhpui, Shiv Sena hruaitu, Eknath Shinde sorkar an zawm a, Ajit Pawar hi deputy chief minister atan lak luh a ni. Hetih lai hian Sharad Pawar-a kaihhruai NCP hian Ajit Pawar-a zuitu MLA 40-te lakah hian party inkaihhruaina bawhchhiaa puhin, India Danpui hnuaia Tenth schedule-a anti-defection law ṭanchhanin, Speaker hnenah hian ban an nih theih nan lehkha an theh lut.

Chief justice of India, DY Chandrachud kaihhruai bench chuan he thu hi ngaihtuahin, bench-ah hian Justice JB Pardiwala leh Justice Manoj Misra te an tel. Maharashtra assembly speaker aiawh hian Solicitor General Tushar Mehta dingin, thutlukna siam tura hun mamawh belh a nih thu hi a sawi a, Supreme Court bench hian MLA 40-te disqualify-na tur chungchanga speaker-in thutlukna a siam hun hi February 15 thleng a pawhseisak leh ta a ni. Ajit Pawar leh MLA 40-te anti-defection law hmanga ban tura ngenna hi Sharad Pawar-a kaihhruai NCP mi, Jayant Patil-a'n a theh lut a ni.