Bihar Chief Minister atan Nitish Kumar lak luh a ni

Nitish Kumar chuan Bihar-a Mahagathbandhan hnuaia a thawhpui party-te nen an thawhhona titawp a, Chief Minister aṭanga banna a theh luh hnuah Bharatiya Janata Party (BJP) thawhpuia sorkar thar siamin, a vawi kua nan Pathianni khan Bihar chief minister atan lak luh a ni.

National Democratic Alliance (NDA) thawhpuia Bihar-a sorkar thara Chief Minister atana Nitish Kumar lak luh a nih rual hian, state BJP president, Samrat Choudhary leh Vijay Kumar Sinha te chu deputy chief minister atan lak luh an ni ve bawk. Samrat Choudhary hi March 2023 khan state BJP president atan ruat a ni a, Bihar Legislative Council-ah BJP aṭangin leader of opposition a ni bawk a ni. Pathiannia chief minister leh deputy chief minister lak luh rual hian minister paruk lak luh tel nghal niin, heng zingah hian JD(U) mi, Vijay Kumar Chaudhary, Bijendra Prasad Yadav leh Shravan Kumar te, BJP mi Dr. Prem Kumar, Hindustan Awam Morcha (Secular) president, Dr. Santosh Kumar Suman leh Chakai aṭanga independent MLA pakhat, Sumit Kumar Singh te an tel.

Bihar-ah hian Nitish Kumar-a kaihhruai Janata Dal (United), Congress leh Rashtriya Janata Dal (RJD) te chuan ṭangrual pawl, Mahagathbandhan dinin, kum 2020 state assembly inthlanah khan sorkarna an siam a ni. Nitish Kumar hi Lok Sabha inthlan atana eptu party dangte nen thawkho turin INDIA-ah a tel leh a, mahse, Zirtawpni khan chief minister aṭanga a banna leh INDIA chhuahsana, NDA a zawm thu hi a sawi a ni.

Bihar chief minister atana lak luh a nih hnuah Nitish Kumar hian Mahagathbandhan chhuahsana NDA a zawm chu Bihar tana ṭha tur a nih thu sawiin, Mahagathbandhan-a a thawhpuite chuan JD(U) angin hna an thawh ṭhat ve loh thu a sawi. Prime Minister Narendra Modi chuan Pathianni tlai khan Nitish Kumar lawmpuina hi X-ah post-in, Bihar-a NDA sorkar thar chuan Bihar tana theihtawp a chhuah tur thu a tarlang.