Minister-in Lengtea EPIP a enfiah

Commerce & Industries minister F Rodingliana chuan nimin khan Lengtea Export Promotion Industrial Park (EPIP)-a hmalaknate a enfiah a; a nihna ang tur taka industry bunna atan hman ṭangkai tura buatsaih chu tihmâkmawh a nih thu a sawi.

F Rodingliana chuan, EPIP chu humhalh a pawimawh thu sawiin, "Ṭha taka humhalh leh a nihna ang tur taka industry bun nana hman ṭangkai a nih theihna tura buatsaih chu tihmakmawh a ni. Industry lama tui ṭhalai leh mithiam zawkte'n hma an lak theihna tura kawng lo sialsak hi thil ṭul leh pawimawh a ni," a ti.

Dan loa EPIP hmun ṭhenkhat mimalin an luah leh pass nei hial an awm nia lang chu veiawm a tih thu sawiin Minister chuan, "Hun remchang hmasa berah industrial area chhunga ram nei nia inchhálte a huhoa koh khawm a, huan lo/ram pass an neihte enfel a ni ang," a ti a; industrial park tihhmasawn leh humhalh nan a hungna bakah, inkalpawhna siamṭhatte chu hna hmasa tur a nih thu a sawi.