Kut fai a pawimawh - BJP President

BJP, Mizoram pradesh president Vanlalhmuaka chuan, prime minister Narendra Modi-a'n a ngaih pawimawh em em chu kut silfai a nih thu leh, Mizorama mipui pawhin an mamawh chu 'kut fai' tho a nih thu a sawi.

Nimina BJP pisaa political session-ah Vanlalhmuaka chuan, "Pu Narendra Modi-a'n a ngaih pawimawh em em chu kut silfai a ni. Mizorama mipui rawngbawltute pawh hian hei tho hi kan mamawh a, kan kut a fai chuan kan hnathawh pawh a thianghlim ang a, kan rinawm dawn a ni. Kan hnathawhna ṭheuhah kut fai leh thianghlim nei a, kut silfai hi kan mamawh hle a ni," a ti.

Vanlalhmuaka chuan, Narendra Modi kaihhruai sorkar kum 2014-a a pian aṭangin India ram hmun hrang hrang, ṭawp tak ni ṭhinah faina a thleng mek niin a sawi a; inlungrualna a pawimawh thu sawiin, "Kan ram leh hnam dinchhuahna tur pawhin kan inlungrual a, hnam inlungrual tak kan nih chuan tu mahin min ngam thei dawn lo a ni," a ti bawk.