Sipai bángte tan thuthlung ziak

Sorkar laipuia Ministry of Defence leh Mizoram State Cancer Institute, Aizawl chuan nimin khan Zemabawk Cancer Institute-ah Mizorama Ex-servicemen Contributory Health Scheme (ECHS) hamṭhatna dawngtute'n cancer natnaah enkawlna ṭha bik an dawn theih nan thawhhona thuthlung (Memorandum of Agreement) an ziak.

Thawhhona thuthlungah hian ECHS, Guwahati Regional Centre director Col. Jitender Mann leh MSCI director Dr Jeremy Lalrinsanga Pautu ten hming an ziak. Inremna ang chuan, sipai báng leh an chhungte damlo, ECHS Polyclinic, Aizawl leh ECHS Polyclinic, Lunglei aṭanga MSCI-a thawn (refer)-te chuan an ECHS card hmangin a thlawnin enkawlna ṭha bik an dawng thei dawn a ni.

ECHS hi April 10, 2003 aṭangin Ministry of Defence hnuaia Department of Ex-Servicemen Welfare-in a kalpui ṭan a; scheme-in a tum ber chu sipai bángte leh an chhungte tana changtlung taka damlo inenkawlna pek a ni.