Aam Aadmi Party (AAP) chuan Ningani khan Delhi assembly inthlana an chak hnuah mi maktaduai chuangin an party an zawm thar tih an sawi.

Nimin zingah khan AAP hian an party twitter-ah hemi chungchang hi an tarlang a, hnehna an chan hnu khan darkar 24 chhungin mi maktaduai chuangin an party an zawm niin an sawi. An party zawm duh tana miss call theihna number an tarlang tel nghal bawk.

Mobile number an tarlan hi Thawhlehnia an chak hnu lawk khan an tlangzarh a, mi nuai 11 velin an call tawh niin AAP chuan an sawi. Thuchhuah an siamah chuan he mobile number hi media hrang hrang kaltlangin an thehdarh tih an tarlang a, ramchhung hmun hrang hranga mite chuan an thlawp ṭha hle tih an tarlang a ni.

Aam Aadmi Party hian a ṭum thumna turin Delhi-ah hian sorkarna an siam leh dawn a, party chief Arvind Kejriwal chuan Pathianni hian CM ni leh tura thutiam a la ang.

Thawhlehnia inthlan result puanah khan AAP hi chiang takin an chak a, seat 70 awmna Delhi Assembly-ah seat 62 an la a, BJP chuan seat 8 an la ve bawk a ni.

Association of Democratic Reforms (ADR) in a tarlan danin Delhi MLA thlan thar zinga 74% chu millionaire an ni a, an zingah hian AAP MLA 45 leh BJP MLA pasarih an tel. Chawhrualin MLA pakhatin cheng vaibelchhe 14.29 nei ang an ni. Hetih lai hian MLA thar zingah thubuai, criminal case nei 43 an awm bawk. 

MLA thar zinga 39 chu kum 25-50 inkar an ni a, kum 51-80 inkar 31 an awm bawk. MLA 70 zingah hian hmeichhia pariat an awm a ni. 

Share this Post