Cambridge City Council-in CAA duh lohna resolution pass

Massachusetts, US-a Cambridge City Council chuan Citizenship Amend­ment Act (CAA) duh lohna resolution a pass ve leh a, he dan hi sut leh turin India sorkar a ngen nghal bawk. 

Hemi hma hian US-a city council thil­tithei ber zinga mi, Seattle city council chuan CAA duh lohna resolution hi a lo pass tawh bawk a ni. 

Cambridge City Council chuan India rama sakhaw hrang hrangte zalenna vawn nun a nih zel theihna turin CAA hi dang turin India Parliament a ngen a, hei bakah hain National Register of Citizens (NRC) kalpui a tum pawh ti lo turin a ngen bawk. 

Resolution-ah hian nikum De­cember thlaa India Parliament-in sakhaw behchhana India khua leh tui nihna pek theihna tur dan a siam chu city council chuan a ngaihven nghal tih sawiin, prime minister Narendra Modi-a kaihhruai sorkarin inthliarhranna leh inrahbehna policy a kalpui chu an council chuan a duh loh hle tih a sawi. 

US Commission on International Religious Freedom chuan CAA vang hian India home minister leh PM Modi-a thawhpui, Amit Shah hrekna siam turin US sorkar a lo ngen tawh bawk a ni. 



Share this Post

Login to comment
No Comments