Silly Point League kharna hapta

Bang, bang, Maxwell's silver hammer; Made sure that she was dead. Lennon/McCartney (The Beatles)

Over 50 chhunga an tumpui Afghan ho 292 runs siam um tur Aussies batting line up chanve chu over 15 pawh an la bat lo tiin, 69 runs chiah an la siamin pavilion lamah an let leh vek tawh.

Cometh the hour, cometh the man

Winston Churchill a ṭawngkam ropui tak 'Cometh the hour, cometh the man' hi, duhlian ṭawnga letling tur hian ka thiam leh finna in a tlin lo. "Hun khirh a rawn inherchhuah hian mi ropui leh rothap te an rawn pen chhuak ṭhin," tih hian letling zo tak maw.

Chu hun khirh leh thim tak vai kiang tur chuan Glenn Maxwell a rawn pen chhuak ngei tih erawh khawvelin a hmu chiang ngei e. Infiamna khawvela mi ropui Michael Jordan, Lionel Messi, Tiger Woods, Pete Sampras etc kan tih te hi inkhel kaltluang ni lo, chak tawh dawn lo dinhmun, hun beidawnthlak leh beisei bo tawhna ruama an khelhpuite leh tumpuite tam zawkin flag var an zar tawh hnua rawn inhai chhuak a, hnehna hlado rawn chham leh ṭhin te an ni.

Thawhlehni zan Wankhede Stadium, Mumbai-ah khan darkar hnih chhung chu khawvelin 'superman' a hmu a, Sydney leh Melbourne khawpui mihring tam zawk kha chu an zing dar 3:00-a mutmu tuah chu sawi loh, thin thaw depin an awm a ni.

Mumbai khawlum leh uap avanga a taksa tuiril a hloh hnem tawh avangin, a ke tha a tawm vek tawh a, a kawng chin hnuai lamin tha a nei tawh lo. "Ka kawng hnuai lamin eng hna mah thawk thei lo mahse, ka ban tha ka la nei," tiin Maxwell hi a infuih mawlh mawlh a ni ber. A ṭhiante panga an thih tawh hnua over 35 a la bang khan Maxwell chuan, awm hmun aṭanga six leh four hlap dan technique, khawvel mit hmuhah demonstration a nei a ni ta ber mai awm e.

A bon

A ṭhiante lahin a khat tawkin an peih loh san reng a, bat pui tur a haichham takngial dawn emaw tih hnuah captain Pat Cummins rawn lutin, World Cup leh Cricket khawvel record hrang hrang chu over 4-5 dan lekah a rawn inhlap chhuak ta zung zung mai. Chung zinga ropui deuh ber chu, wicket pariatna partnership - 202 runs an siam dun kha ni ngei ang. Captain Cummins hian 12 runs a contri ve a ni.

Ni e, kha zan khan captain Cummins-a'n a tih tur a nei lem lo, a hna ber ber chu Maxwell-a'n kawppui a neih theih nana lo dam ve char char kha a ni ber. A hmalam feet 60-a, a ke leh kawng hnuai lamin hna a thawh tawh loh avanga, thla tel loa thlawk thei ta hial emaw tih mai tur Maxwell a sapatal lo thlir kha a tih ber zawk chu a ni, tiin a sawi theih bawk.

Cummins hi Wankhede Stadium-a inkhel en hnai ber leh thikawm ber a ni hial awm e. Afghanistan-in Australia an hneh lo kan ti dawn nge, Glenn Maxwell an hneh lo kan ti zawk dawn ni. Thawhlehni zan result avang khan, Glenn Maxwell chuan a ram Australia chu amah te chauhin semifinal tlang chhipah a paw thleng ti mai ang aw.

Kum 20 liam ta ICC World Cup 2003-a South Africa rama an nghah ṭum khan, Glenn Maxwell te senior leh nikum lama chatuan ram pan ta Andrew Symonds chuan thil ropui a ti. Pakistan nen an intum ṭumah Australia-in 80 runs lek an la siam tihin wicket li a tla tawh. Hun harsaah Symonds-a a rawn pen chhuak a, 148 runs a rawn vuakchhuah kha vawiin thleng hian World Cup innings-a ropui ber zinga an chhal a la ni ṭhin. Thawhlehni zan inkhela Glenn Maxwell a double century zet zawngin a rawn khum kan tih ngam chiah loh pawhin a rawn nihrualpui chiang ngei e.

Bangalore lamah aw!

India-in semifinal inpuahchahna atan practice match ṭha tak Netherlands nen tun Pathianni hian M. Chinnaswamy Stadium, Bangalore lamah an khel dawn. He inkhelh ṭan hma hian semifinal-a Rohit Sharma leh a hote khingpui tur a chiang vek tawh ang.

Semifinal hi Wankhede Stadium, Mumbai-ah khelh a ni dawn a, chutihrualin Pakistan-in semifinal an luh erawh chuan Eden Gardens, Kolkata-ah khleh a ni thung ang. He thu ziah lai hian Men in Blue khingpui tur hi a la chiang lo a; New Zealand, Pakistan leh Afghanistan te zinga tu emaw ber hi an ni ang.

A ngaihawm telh telh

Kanlo ziahlan fo, tournament-a pawimawh ber an tih ṭhin chu, "A hun taka a vawrtawp thlen," (peaking at the right time) hi a la ni reng. Kaltluang em em mai, mahse tun hnai kum 4-5 chhunga ICC tournament zawng zawng deuh thawa tlang chhip ber thlen dawna tawlhthluk ching India team kha an la ni em?

World Cup Specialist Australia (Palian mutthlu ka lo tih tawh) chu a ṭhangharh ṭan em ni? South Africa kum a rawn inher ve ta nge? Ṭum hnih a zawnin final-ah kan chak lo tawh a, a ṭum thumna chu khuanu duan kan ni ve tawh tiin New Zealand hi an rawn kal zel dawn? I lo thlir zel ang.