Title Fight zan khatna kan nghak chhuak

Tata SK 612 LPS Pro Fight title fight chu zanin dar 8:00 hian LPS Arena, Falkland Park-ah khelh a ni dawn a, inhnek pali a awm ang - Title Fight hi zan hnih neih tur niin Inrinni zanah inhek dang pali a awm leh bawk ang.

Pro Fight title fight hi round li zel tur niin WBC India championship erawh round riat tur a ni thung. Ticket man Rs 50 leh Rs 500 a ni; LPS YouTube channel-ah live-a pek chhuah a ni dawn a, mahse en thei turin pawisa chawia member nih a ngai thung dawn a ni.

Middleweight

Pro Fight hmasa khan C. Lalhruaitluanga hi welter huangah a champion, kuminah middleweight champion nih leh a tum - a hma a ding tur F. Lalthanliana Junior pawh tawnhriat nei ṭha ve tho a ni. Inhnek a hmuhnawm ngei ngei dawn.

Chawngtlai tlangval Hruaia hi a zawna vawi ruk chak zawn thei a ni a, a khingpui tur Thanliana hi Mizoram Fight Night lightheavy champion ni a, tun ṭumah hian Hruaia a hneh a nih chuan Pro Fight-a a tel hmasak berah a champion nghal dawn tihna a ni.

Super bantamweight

Mumbai boxer Adil Rajesh Kumar Singh leh Cherhlun tlangval F. Zoramchhana te hi incho tawk tak an ni. Adil Rajesh-a'n professional boxing vawi 15 a khelhna tur niin WBC India bantam ranking-ah pathumna a ni mek. A khelh ṭhinna a aia rit super bantam-ah khelin Mizo boxer a hmachhawn dawn.

WBC India super bantam ranking-a palina Zotea hi dah hniam chi a ni lo. Pro Fight title fight-ah tum thum inlan tawhin title fight a thleng a, mahse a chak lo zawkah a ṭang ṭhin. WBA Asia title chuhin Bangkok-ah a chak lo tawh bawk, a tawnhriat aṭanga inzirin hlawhtling zawk nih a tum ang.

Bantamweight (WTA title)

Professional huanga tawnhriat la nei tam bik lo Pradish-a leh Laldingliana ten chungnung zawk nih an inchuh dawn. Chennai boxer hi WBC India super fly ranking-ah 11-na a ni mek. A khelh ṭhinna aia weight rit zawkah title a chuh dawn a, a tan fiahna pawimawh tak a ni dawn.

Dinga hian kum 2019 Pro Fight bantam title a lak hnuah professional a luhchilh a, a zin kawng erawh a tluang tawk lo. Vawi nga inhnek tawh mah se ṭum hnih chu result awm lova nuai bo a ni a, vawi thum khel tawha chhinchhiah niin a chak vek a, mi pahnih a knockout. Tun hi professional huanga a inhnek tawha lian ber tur a ni a, champion kawnghren hreng ngei turin a inpuahchah nasa.

Bantamweight

Laldinsanga tan Ramdinthara hi fiahna a ni dawn. Lunglei Ramthar tlangvang Dinsanga hi kum 2022 aṭangin Pro Fight-ah a tel, nikum Pro Fight semifinal aṭangin professional a luhchilh a, vawi nga a chak zawn mek a ni - inrintawkna a neih san vanglai tak.

Pangzawl tlangval Ramdina'n beisei phak bakin inelna a hmang ṭha. Nikum khan round of 16-ah tlain kuminah rahbi a tuk sang hle. Semifinal-ah Omega Lalramdina hnek tluin knockout zui lo mah se phu takin a chak a, professional luhchilha Title Fight hmachhawn turin a inpuahchah a, rapthlak taka che turin a intiam.