HLA PATHUM CHUNGCHANG

Good Friday lai leh Lalpa Zanriah Sakramen Inkhawm apianga kan hla sak lar em em ṭhin chu, “Zan lungngaihthlak, Zion pindan chhungah” tih hla hi a ni a, he hla hi Kristian Hla Bu-ah hian Patea phuah niin tarlan a ni a. Amaherawhchu, he hla hi Pastor Chhawna khan ama phuah a nih thu heti hian a lo ziak a, “Tin, Khawbung Inkhawmpui ṭiak...in min chelh a, sial an talh a, Isua tuarna lam hi ka sermon a, mipui an ṭap...hle mai. Patea’n i sermon kha hlaah siam teh khai, Khawbung hriat reng nan a ti a, he hla hi ka siam ta a ni :- ‘Zan lungngaihthlak Zion pindan chhungah, Ka Lalpa'n a thisen a semin’ tih hi ka siam ta a ni,” tiin a lo ziak a (A chunga ... tia kan dah khi a kutziak chhiar har lai deuh a ni a, kan dah àwl ta mai a ni).

Pastor Chhawna khan he hla a phuah dan chiang taka a lo ziak hi ngaihven deuh a ṭul hle. He hla phuahtu chungchangah hian symposium emaw huaihawt ni se, tih chian a ṭul niin a lang. Tin, Kristian Hla Bu ennawn mek a ni bawk a, he hla phuahtu chungchang hi chhui chian deuh a nih loh chuan nakin zelah zawhna a awm reng ang tih a rinawm a, Kristian Hla Bu thar turah pawh he hla phuahtu dik tak hi tarlan ni se a duhawm hle. Ziak mite leh chhui mite pawh he hla phuahtu chungchang hi chhui chiang a, a theih ang ang a rawn thai lang ve turin ka ngen a che u.

Krismas a lo hnai leh ta! Zoram hmun tina Krismas laia kan hla sak lar em em fo chu, “Mal min sawm turin,” tih hla Pu Patea phuah hi a ni. He hla hi a ropui a, a ril em em bawk. Chutih lai erawh chuan, he hla a thunawn kan sak/thluk dan inang lo hi a veiawm a, sak/thluk dan inang tlang neih a duhawm hle. Kan thluk/sak dan inang lo lai chu a thunawn bul, “Lawm r’u, lawm r’u” tih lai hi a ni. Hmun ṭhenkhatah hian, “Lawm r’u” tih leh “Lawm r’u” tih inkar hi an thlûk rei deuh a, vuak hnih lai an ti tla a. Chutianga sa chu an awm nual a ni. Mahse, hemi inkar hi vuak khat chauh tla tur niin a lang. He hla phuahtu hi Pu Patea hi Khawbung khua a ni a, khi lai khua khi he hla lo chhuahna hmun ang pawhin a sawi theih bawk. He hla lo chhuahna lam Tuipuiral lamah khi chuan “Lawm r’u” tih leh “Lawm r’u” tih inkar hi vuak khat chauh tlain an thluk ṭhin a, hei hi a sak dan tur zawk ni awm tak a ni. Tin, hei hi Mizo Kristian Hla thar buah pawh a sak dan tur an ziah dan a ni bawk. Chuvangin, he lai a thunawn bul kan thluk dan hi Hla Bua mi ang hi ni se, kan rual tlang ber ang.

Tin, Krismas laia zaipawlte sak lar tak ṭhin pakhat “Ngai teh, van Lal nau ang pian ni” tih hla, Upa Lalhmingliana hla phuah hi hla ropui tak leh hla thu mawi tak niin ka hria. Chutih lai erawh chuan, zaipawl lar tak pakhat chuan a phuahtu phuah dan ang lovin he hla hi an sa a, an sa lar phian lehnghal a, chutianga sa zui ta zaipawl ṭhenkhat leh mimal zaithiam ṭhenkhat pawh an awm bawk niin a lang.

Hetianga miin Pathian hnen aṭanga an dawn, an phuah dan ang lova sak hi a pawi ṭhin. Hla thu mawi tak leh hla ṭha tak hi a phuahtuin a phuah dan ang takin sak ni se a duhawm hle. He hla hi Mizo Kristian Hla thar Bu-ah No. 17 na a ni a, he hla sa zel turte pawhin a hla thu dik tak, a phuahtu phuah dan anga sak zel ni se, a ṭha ang.

-Mawia (Stephena pa)