MPF-in an thawh hlâwk

Mizoram police hotute chuan Mizoram Legislative Assembly inthlanpui neih zawh takah dan leh thupek kenkawhnaah harsatna a awm lo a, boruak muanawm tak hnuaiah inthlan kalpui a nih thu an sawi a, a lawmawm hle.

Mizoram Police-te hian inthlan laia dan leh thupek chungchanga buaina a awm leh awm loh pawh Ministry of Home Affairs-ah darkar tin report an thawn ṭhin tih an sawi a; harsatna an tawh loh thu an thlen ngei pawhin a rinawm a, sorkar laipuia hotute mithmuhah kan lang mawi ngeiin a rinawm.

Mizorama inthlanpui kan kalpui dan leh inthlan kaihhnawiha kan chêt dan hrang hrangte hi duhthusam a ni bik loin a rinawm a, chuti chung chuan India rama state dangte inthlan dan ngaihtuahin, a felfai tak zet. State dangahte chuan intihbuaina leh insual buaina te, tharum thawhna chi hrang hrangte hriat tur a awm fo a; Mizoramah erawh chuan hriat tur a awm meuh lo.

Mizorama inthlan a felfai a, a rálmuan chhan hi a bul berah chuan Pathian ringtu kan nih vang a niin a rinawm. Pathian thu hi zâwm vek thei lo mah ila, eng emaw chen chu kan nun kaihruaitu a ni ngei tih a hriat theih a, chu chuan rah chhuahin, mi mithmuhah pawh kan mawi phah a ni.

Inthlan chungchangah MPF hmalakna hi sawi hmaih chi a ni lo. Mizote hi chu a neitu, a taka tawngtu kan nih avangin MPF hmalakna ṭhatzia leh inthlanna thianghlim leh rálmuang nei tura an hnathawhin awmzia a neih nasatzia hi kan chhût chiang kher lo mai thei a, ngaiah kan neih vang pawh a ni thei; hnam dangte hian an hmuh fiah zawk mahin a lang.

Duhthawh luat vang leh rilrua awm ang a nih loh avanga MPF leh an hmalakna sawisel bawrh bawrhte an awm ṭhin, a awm ve thei tho mai. Mahse, MPF hmalakna hlâwkzia leh hlutzia hi hmu thiam duh tan chuan chiang taka hmuh theih a ni a, hai theih a ni lo. MPF hmalakna leh hnathawh hi duhthusam ang vek hi lo mah se, an thawh hlâwk hle a ni.