BSP MP-te'n West UP state pek an phut

Bahujan Samaj Party (BSP) hruaitu leh Bijnor aṭanga Lok Sabha member ni bawk, Malook Nagar chuan West Uttar Pradesh tana state hran pek an phut thu leh, helai bial hmasawnna atana state-a hlankai chu tihmakmawh a nih thu a sawi.

Uttar Pradesh aṭanga West UP ṭhen hran a, state-a hlankai hi Union Minister Sanjeev Balyan chuan a lo rawt tawh a ni. Meerut-a International Jat Parliament neihah Union Minister hian Western UP hi state hran a nih a ṭul thu leh, Meerut chu state khawpui ni nghal bawk se a duh thu a sawi a, mahse, BJP party chhung ngei aṭangin sawiselna a nasa hle. BJP chuan Sanjeev Balyan rawtna chu an pawmpui loh thu sawiin, BJP MLA hlui pakhat chuan Western UP tana state pek a nih chuan Pakistan te nau a nih hial tur thu a sawi bawk.

Balyan thusawi chungchanga thu thar lakhawmtute zawhna chu Malook Nagar chuan,"Nakinah chuan UP thlang lam (Western UP) hi state hran a la ni ngei ang. Hei hi tuna kan mamawh thil a ni a, helai biala mipuite hian harsatna tam tak an hmachhawn phah a ni. A ṭul hun apiangah he thil hi ka sawi chhuak zel ang," tiin a chhang a ni. Nagar chuan BSP chu Uttar Pradesh hmun lia ṭhen duha rawtna siamtu an nih thu sawiin, 2011 khan Mayawati kaihhruai BSP chuan Uttar Pradesh Assembly-ah voice vote hmangin Purvanchal, Bundelkhan, Awadh Pradesh leh Paschim Pradesh-ah te ṭhen an lo rawt tawh thu a sawi a ni.