Mann Ki Baat : Sardar Patel-a pian chamah Mera Yuva Bharat tlangzarh tum a ni

Prime minister Narendra Modi chuan thla tina radio-a hun a hman ṭhin, Mann Ki Baat programme chu nimin khan a hmang leh. Nimina a hun hmanah hian PM chuan ṭhalai leh naupang zawkte tana ram inrelbawlna leh siam ṭhatna kawnga an tel ve theihna tur 'Mera Yuva Bharat' chu October 31, Sardar Vallabhbhai Patel-a pian chamah tlangzarh tum a nih thu a sawi a, hemi rual hian Mera Yuva Bharat website pawh hawn a ni bawk ang.

Prime Minister chuan Ṭhalaite chu MYBharat.Gov.in-ah in register turin a sawm a,"MYBharat hian kawng hrang hrangin ṭhalaite tan hmun a siamsak dawn a ni. Ram inkaihhruaina thu hlaah an tel vena tur tam zawk ngaihtuahin, he hmalakna kaltlang hian ṭhalaite theihna hmanga ram siam ṭhat leh India hmasawnna tur hna thawh theih kan tum a ni," a ti.

Mann Ki Baat-a a thusawiah hian PM Modi chuan October 31 chu Prime Minister Indira Gandhi thih cham a nih thu sawiin zahna chibai a buk nghal bawk. Tualchhung thil siam vawrh larna kawngah tuna hunpui hman laia pawha a tam thei ang ber India kutchhuak thil lei a, hmang turin mipuite a chah bawk.