Bangladesh-in 1971 indonaa India sipai thite tan memorial din

Liberation war of Bangladesh, 1971-a India sipai nunna chante zahna leh hriatrengna atan Bangladesh sorkar chuan an rama Ashuganj hmunah memorial dinin, tunah hian hna thawh zawh a ni hnai tawh.

Bangladesh minister for liberation war affairs, AKM Mozammel Haque chuan memorial chu December-a peih hman tum a nih thu leh, nakkum March emaw April-ah, India Prime Minister emaw Bangladesh Prime Minister hawntir an tum thu a sawi.

He memorial hi 1971 indonaa tel India sipaite pual liau liaua Bangladesh-a din hmasak ber a ni a, a sakna tur lungphum hi March 2021 khan Prime Minister Narendra Modi leh Prime Minister Sheikh Hasina te'n an lo phum tawh a ni. Haque chuan memorial-ah hian India sipai indonaa nunna chante zawng zawng hming ker a nih tur thu leh, chu chu he hmun tlawhtute zawng zawngin Bangladesh-in zalenna kan neih theihna atana inpete an hriat theihna tur a nih thu a sawi bawk. Haque hian a hawn hun tur an tihhlat chhan chu ram pahnihah inthlan a awm chhoh dawn avang niin a sawi a, nakkum March emaw April-ah, Prime Minister-te pahnih sawm ngeia hawn an tum thu a sawi a ni.

Ashuganj hi Tripura dep ramria awm a ni a, India aṭang hian kawngpui pangngai zawhin a thlen theih a ni. Lt. Col. Quazi Sazzad Ali Zahir chuan India tana hnai taka memorial din chu an tum pakhat a nih thu sawiin, memorial chu in ropui satliah mai ni lo a, ṭhangtharte tana inzirna tur leh an hmuh fo tur, 1971-a indona thleng hriattirna tur a nih thu a sawi. Memorial sak huam chhungah hian naupangte tana intihhlimna tur hmunte buatsaih a ni bawk. Bangladesh zalenna atana 1971 indonaah khan Ashuganj aṭang hian India sipaite chuan Meghna lui kanin Dhaka an pan a ni.