Ronaldo ropui zanah Real Madrid chak chiang

Inrinni zan khan Real Madrid tan Cristiano Ronaldo chuan goal li a khung a, Celta Vigo lakah 7-1 in a team hnehna a chanpui.

Ronaldo tan tun season-a vawi 35 a inlana a goal 39-na a ni a, tun season-a hattrick a siam vawi ngana a ni bawk.

Real Madrid tan hliam vanga a chawlh reng hnua lo kir Gareth Bale, Pepe leh Jese Rodriguez-te chuan goal khat ṭheuh an khung bawk a ni.

Inkhel chu

First half-ah Real Madrid-in beisei an phak lo a, an match hnuhnung pathum chhung chak zawn tawh Celta Vigo an hlauhawm hmasa zawk. Europa League khelh tum club hian Iago Aspas hmangin hun ṭha an nei a, mahse Liverpool striker hlui hian post a tauh per.

Minute 41-naah Pepe-a'n Real fan-te rilru hahdam nan goal a khung a, Portuguese defender hian Isco corner aṭanga ball lokal chu tun season-a a goal hmasa ber ni turin a tauh lut.

First half-ah team pahnih inbei tawk mah se second half-ah Real tan Ronaldo a inlar a, Portugal captain hian minute 50-naah yard 25-a hla aṭangin Real goal hnihna a khung a, minute 15 chhungin hattrick a siam.

Ronaldo-a'n a goal thumna tur a khung hmain Celta Vigo tan Aspas a lang ve zawk a, Spanish striker hian tun season-a a goal 10-na a khung.

Real Madrid tan Ronaldo-a'n minute 76-naah an goal lina a khung leh a, Jese leh Bale-te'n goal khat ve ve a chhunzawm leh in Celta tlarhnung te'n Real tlarhma an dang zo ngang lo.

Ronaldo ropuina

Real Madrid tan Ronaldo-a'n tun season La Liga-ah goal 27 a khung tawh a, heti zat goal khung tur hian match 28 chiah a mamawh.

Kum 31-a upa forward hian Real tan league match 228 a inlanah goal 252 khungin goal 251 khungtu Athletic Bilbao striker ropui ṭhin Telmo Zarra a khum.

La Liga bika goal khung hnem lama a tluk loh awmchhun chu league match 337 a inlana goal 305 khungtu Lionel Messi chiah a ni.

Barcelona-in nizan khan Eibar an hmachhawn a, Messi-a'n goal a khung chuan Ronaldo nena an inthlauhna hi a la danglam leh thei a ni bawk.

Ronaldo hian Real tan inelna hrang hrangah match 335 a khel tawh a, goal 352 khungin a record hi sawi nep theih rual a ni lo.

Zidane thukhawchang

Real Madrid coach Zinedine Zidane chuan, "Cristiano theihna hi chu kan hre vek a, match khata goal li khung thei khawpa ṭha niin hetiang player hi an tam lo - chu tak chu a ropuina a ni," tiin a player chhuanvawr a fak.

Inkhelh laiin fans ṭhenkhatin Ronaldo an au el a, karhmasa lawka a teammate-te an ṭha tawk lo nia sawitu forward hi fans ṭhenkhatin an lawm lutuk lo. Hetihlai hian fans ṭhenkhat chuan club president Florentino Perez duh lohna an au pui bawk.

Zidane chuan Ronaldo-a'n au el chungchang sawi chhunzawmin, "Fan-te'n ṭawngkam na tak hmanga player-te an auh ṭhin hi chu football-in a ken tel ve reng a ni. Fan-te hian engkimah a ṭha ber zel an duh a, hetihrual hian an player-te theihna an hriatchian avangin a hma aia ṭha zawk an beisei zel a ni. Hei hi keini tan chuan hmasawn zel tura min fuih phurtu a ni," tiin fan-te demna thu a auchhuahpui duh lo.