Zarkawt ngam loh Mission Veng

Mizoram Super League-in a hming a pu zo a, season 2-ah basketball inkhel hmuhnawm leh player thiam bik hmuh tur an awm a, duhthusam loh lai erawh Hawla Indoor Stadium a êng tawk lo tih zawng a ni.

Ningani zanah Mission Veng Vikings-in Zarkawt BCA 84-76 in an hneh. Vikings hian BCA an hneh hma hian Zarkawt Serpents an hneh tawh a, MSL2-ah Zarkawtin Mission Veng an ngam lo - semifinal a la awm tih erawh hriat tel a ṭha.

Lalrina Show

Vawi hnih chak tawh Vikings-in MSL2-ah hma an hruai a, champion rinkai BCA an hnehna kawngah Lalrina Renthlei a hmuhnawm hle.

Tuikhuahtlang tlangval Lal-rin-a chevel hi fak chawp a mawi a ni lo, a hmuna en chuan a khawih apiang rangkachakah a chang zel emaw tih mai tur a ni.

Lalrina hian point 27 zet a lut a, assist vawi nga leh rebounds vawi riat a nei a, stats a lang tel lo chu a chevel hmuhnawmna kha a ni.

Vikings coach Reuben Lal-chhan-dama chuan, "Lalrina hi MSL1 ang tho khan a ṭha a, tun season-a a danglamna chu team tan a khel tawh. Kan chakna erawh mimal vang a ni lo, kan vaiin an khel ṭha vek," tiin team thawhrah a hmuhhmaih lo.

Vikings boss ChD-a sawi ang chiahin BCA an hnehna kawng-ah Moses Zoremmawia, K. Lal-rin-chhana, Lalruatkima Sailo leh Lal-nunpuia ten tha an thawhhlawk hle.

Relegate thei BCA

Zarkawt BCA hi MSL1 finalist leh Marova Memorial Basketball champion an ni a, MSL2-ah erawh chak la nei loin table mawng-phahah an awm a, tla thei an ni.

BCA boss R. Liansangpuia chuan, "Keini aiin an lut thei a, kan chak loh avangin sawi tur a vang khawp mai. Tun aia ṭha zawka rawn khelh ngei kan tum," tiin an result hriatthiam har a tih thu a sawi.

Zarkawt BCA-in Vikings aiin bul an ṭan ṭha zawk a, first quarter-ah Zorinsanga'n vawi li zet 3 points lut mah se Ramthar tlangval hian mamawh hunah 3 points a lut thei tawh lo.

BCA player pawimawh ber Ma-thew Remtluanga'n point 19 zet a nei a, rebounds 14 neiin double double nei pha mah se mawhphurhna zawng zawng la tur chuan a puitling tawk lo. Zarkawt rawlthar Pupua hian MSL1-a BCA bigman Dennis Lalmuanpuia ai awh zo turin hmabak a la ngah a, BCA-in semifinal er phak an tum a nih chuan David Lalruatfela, Jackson Lalrintluanga, Michel F Lalawmpuia leh Henry Lalramngaihawma ten ṭha zawka an khelh a ṭul.

Mipui lam

Zarkawt BCA-in ṭantu an nei chhe lo a, Mission Vengthlang Vikings ṭantu erawh ṭhahnem tak an ni. Inkhelh banah Vikings boss ChD-a'n Vanglaini palai hrilhin, "Inkhel entu an awm a, player ti phur thiam supporter an awm bawk. Kan supporter-te aia ṭha an awm lo," a ti.

Vikings boss thusawi hi a dik tih a takin a lang a, amah-erawhchu MSL2 a hmuhnawm em em laia ṭhutna ruak hmuh tur la awm zeuh zeuh erawh bas-ket-ball ngainatute leh MSL Club supporter-te tan in enfiah a ṭul hle.